Taɣuri n wammud n yisefra "tirga" n Farida Cebbiri

Amaru neɣ amedyaz, yettwassen dakken yettnadi ad yessiweḍ iznan s tira-s i yimeɣriyen-is neɣ ad ten-iwelleh ɣef tɣawsiwin n tudert di  tmetti-s. Massa Cebbiri Farida, d abrid-a i tuɣ deg wammud-is n yisefra Tirga i d-yeffɣen ussan-a ɣer Teẓrigin Cix Muḥend Ulḥusin.

Mi ara teɣreḍ tamedyezt-is, ad d-tesskefleḍ ddeqs n wufuren-is,  isḥissaf-is d wayen i tt-iqerrḥen. S yifyar d tmeɣrut taḥnint, tessuneɣ-d tafelwit n waddad deg i d-yeggra uɣref-is aqbayli neɣ amaziɣ s umata, deg-si i d-tuɣ aẓar. Xas teẓra d akken, tagmat tettwaɣ, tadukli d turhift, tagnit tewεer, tegguma ad tebru i usirem d usfillet yelhan. Isefra n Farida Cebbiri , sduqqusen win yegnen, tthuccun win tɣedder tanafa. Tra ad t-id-tessaki ad yerẓem allen-is ad imuqel yis-sent ɣer yimal, ad yezwi ijufar-is.

Isefra n tmedyazt-nneɣ mmalen-aɣ-d akud, yezgan yettɣawal. Akud-a, yeǧǧa umdan yettazzal, simmal ad irewwel fell-as. Di taggara ahat ad d-yaf iman-is yeffeɣ seg-s, ur iseεεu deg-s amur. Tameskart n tirga, tugem-d ifyar si tala n tudert-is deg yidurar-is n Ǧerǧer d tuɣalin ɣer umezruy d yidles n uɣref-is amaziɣ i yuran s yiseɣ, idammen, tayri n tudert di tlelli akked useḥbiber ɣef wakal. Tirga, d askasi ger tmedyazt d yimeɣriyen-is. Isefra-s, tessenkad-iten am wakken d timsirin-nni n tutlayt tamaziɣt i tesselmad i yinelmaden-is deg uɣerbaz.

Tiktiwin n tmedyazt-a, ttmeslayent i yal ameɣri, ttarrant-t yettḥulfu belli terza-t yal taluft tubdirt. Isental inef tura tmedyazt Farida Cebbiri, ggten, mačči yiwen mačči sin. Tura-d ɣef wayen yettɣurrun d wayen yettḍurrun, am usugget di teflest (laman), iḍes aɣezfan, yir targit, urfan, tiɣin n wawal i wul, yir tikli, tamettant... Akken yebɣu yili usḥissef, tamedyazt, tezga tettuɣal ɣer usirem d usfillet n yimal yelhan, yeǧǧuǧǧgen. Win ara yebdun taɣuri n yisefra-s, s taḍfi ara tt-yernu acku cuban initen n teslit n unẓar.

Sadaq Bendali

https://sadbendali.blogspot.com/2021/11/tauri-n-wammud-n-yisefra-tirga-n-massa.html