Bu tneɛḍab
Yura-t umaru-amedyaz Malek Ḥud
Bubekker d bu tneɛḍab. Seg wasmi i d-yekker iḥemmel taḍsa, iḥemmel ad d-yesseḍs wiyaḍ. Tigzi-ines, tɛedda talemmast, udem-is ur yettbeddil ma yemla-d i yimeddukal n tegnit kra n temseḍsut, nutni ad ttegririben ɣef tmurt seg teḍsa amzun d tteryel i ten-yeskikiḍen deg tleqqaɛin n yiḍarren-nsen ma d netta ad yettkemmil ad d-iḥekku am wakken kra ur yeḍri.
Bubekker, mačči d amesbaɣur n lǧib maca d win n tqulhatin, n uskeɛrer, n usmesxer, n tandiwin, n tedyanin yessewhamen ama wid iɣef ḍrant ama d inigan. Tidyanin-a, zemrent ad ilint s wawal, am wakken zemrent diɣen ad ilint s tigawin bḥal taluft yexdem i umeddakel-is Salaḥ i yebbɣen afus-is anda akken ur yebni ara akk fell-as.
Deg tsemhuyt n tefsut deg tmurt n Leqbayel, agama yettuɣal-d s wudem amaynut, kullec yettlal-d, ddunit merra tettberqic. Ideflawen n yidurar fessin, tiregwa n waman teddunt, iɣewdan swan almi ṛwan, daɣ netta amzun dlen s lizarat izegzawen.
Igdaḍ yal yiwen s tiɣmi-ines ɣef yisekla cennun, yal wa s taɣect i as-yefka Rebbi. Iferṭeṭṭa, tizizwa d kra ubeɛɛuc s wafriwen, ttafgen seg ujeǧǧig ɣer wayeḍ, ttsummun-d aman iẓidanen, ma d wid yetteḥruruden kan deg lqaɛa am tweḍfin zzuɣuren neɣ ttseggiren iɛeqqayen n yirden neɣ n temẓin ɣer yixemjan anda ttidiren ad ten-sxeznen i tallit n usemmiḍ.
S umbiwel akka d wakka n tɣennawt i d-yefka Rebbi, amaḍal deg tefsut yettban-d yettidir. Bubekker ass-nni yezwar s lmal-is. Segmi yebda abrid, netta yettxemmim amek ara as-tt-yexdem i Salaḥ i iwala yeḍfer-it-id mebɛid, ula d netta ɣer tkessawt akka i iteddu. Yerna kan kra, yeldi arquqen-is, yerfed tamiwin-is iberreḥ:” Ufiɣ-tt-id !”
Iruja alaḥal ad t-id-yaweḍ Salaḥ, yekker yessawel-as s ṭṭelq n ugerjum-is : “Azzel-d a Salaḥ ad iyi-d-tefkeḍ afus ! Netta s yifassen-is i sin yeṭṭef ibiri-s seg yiran-is, itekkay fell-asen ɣer lqaɛa.
-Aweḍ-d a Salaḥ, kebleɣ ddaw yibiri-iw yiwen ufrux urǧin walaɣ yiwen am netta deg wakken yerqem, yal tiɣmi i d-yefka Rebbi ad tt-tafeḍ deg wafriwen-is.
Salaḥ yiwen akken n ugerful n uqcic, mebla ma ixemmem izeɛbeḍ-d ɣur-s, yewweḍ kan yerra iman-is ɣef tgecrar.
-D acu ara xedmeɣ tura ? I yenna i Bubekker.
-Ger-d afus-ik s lemḥadra ddaw n yibiri-w, tkemseḍ-t ɣef ufrux yellan daxel, maca ḥader ad ak-yerwel.
Salaḥ icemmer lkemm i yiɣil-is, yebda yesɛedday s leɛqel afus-is ddaw yibiri-nni.
Afrux-agi inek yettdeggir-d azɣal yerna amzun yelɣuɣi akk a Bubekker”.
Bubekker bu texba, ur yeṭṭif ara taḍsa-s, yerfed-d ibiri-nni iwala afus n umeddakel-is yebbeɣ deg leɣber n tfunast mazal ttfurun. Imir-nni kan i d-ɛeddant kra n tsita teddunt s imerjan ad ksent, akken teqqar teqnuẓt-nni :” D acu-tt ? D acu-tt ? Teddunt fessrent ticeṭṭiḍin”.
Salaḥ yeḍlan tabacemmaqt n leɣber n tsita i ufus-is ayeffus amzun d tislit yewwten lḥenni, yessenhaz kan deg uqerruy-is yeqqar :” Yiwen ur ak-yezmir a Jeḥḥa !”
Taɣennawt : création
https://sadbendali.blogspot.com/2021/12/adris-ufrin-arraz-a1u-ikziku-unbir-2021.html
Commentaires
Enregistrer un commentaire