sɣur Fahim Mesɛuden
D tagrest, yekkat udfel. Ttwaliɣ-d si ṭṭaq n tneɣrit imeččimen i d-iɣellin. Ssan ɣef lqaɛa. Ma yewwet akka snat n tseɛtin, ẓriɣ-t ad tt-yessu akken ilaq, ur ttɛeddayent ara tkerrusin. Ad yergel ubrid yettawin ɣer taddart deg i zedɣeɣ.
Inelmaden-iw, ferḥen imi walan yekkat udfel. Llan kra deg-sen, d tikkelt tamezwarut ara t-walin. Ḥḥaren ad d-ffɣen akken ad t-nnalen s yifassen-nsen, wiyaḍ ḥḥaren ad d-ffɣen akken ad uraren akur. Ma d nekk ḥḥareɣ deg yiman-iw amek ara xedmeɣ. Ma ad kecmeɣ s axxam neɣ ad qqimeɣ ar tameddit.
Axeddim-iw, yebɛed azal n 25 yikulimitren ɣef taddart ideg zedɣeɣ. Ẓriɣ tawaɣit i aɣ-yesrusuy mi ara yergel iberdan. Ma yella yessa udfel di temdint, di taddart ula ay d-iniɣ. Yerna mazal-iyi snat n tsaɛtin akken ad kfuɣ tamsirt-inu. Tebɛed tmeddit fell-i.
Ffɣeɣ-d, ruḥeɣ ad d-ẓreɣ anemhal, akken ad iyi-d-yefk ttesriḥ ad ruḥeɣ ad kecmeɣ s axxam uqbel ara yergel udfel abrid. Nniɣ-as, ur d-yenḥerwa ara deg wayen i as-nniɣ. Nekk, beddeɣ kan ttraǧuɣ tiririt ara iyi-d-yefk. Alarmi aṭas, yerra-iyi-d s leɛgez, yenna-iyi-d :
-D kečč i ifernen axeddim dagi, mačči d nekk. Ma truheḍ, a-t-an yettusemma teǧǧiḍ amkan-ik. Ihi aɣbel-agi inek, mačči inu. D kečč ara t-yefrun, mačči d nekk. Wali amek i ak ilaq daya, ḍebber aqerru-ik.
-Tezṛiḍ nekkni s yimesdurar tewɛer fell-aneɣ tegrest, adfel yezga di tsemhuyt-agi.
-Akka i tuɣem tannumi s yimesdurar. Mi d-ɣlin sin yixeclawen, ad trewlem s axxam. Ad teǧǧem axeddim. Ilindi, win akkin, ur tkeffuḍ ara ahil-ik. Yal aseggas, ssebba yiwet, d adfel.
-Meɛna ur sɛiɣ ara tiferni, mačči d lebɣi-w.
-Nekk, nniɣ-ak-d kečč tesliḍ-d, ṛṛay d ṛṛay-ik.
Walaɣ acḥal semmeḍ wul-is, ɣur-i. Yugar asemmiḍ n udfel iteqqsen di berra. Uɣaleɣ kemmleɣ tamsirt i yinelmaden-iw, alarmi ɛeddant snat n tsaɛtin-nni. Allaɣ-iw, mačči dinna i yella, ẓẓay wakud, ugint ad kfunt snat n tsaɛtin-nni, ad as-tiniḍ d ass kamel. Adfel, ur yeḥbis ara tiyita, iɣelli-d d icelliqen. Yuli-d wagu, yegzem abrid i tmuɣli.
Akken tesṭenṭen d zzuǧ n tmeddit, stenyaɣ taggara n wass, qefleɣ tiqfilin n ubalṭun-iw, ffɣeɣ-d s tazzla. Aqrab-iw, deg ufus-iw, ttazzaleɣ, adfel yekkat-iyi-d s udem. Yalci d amellal, yalci idel-it udfel. Deg ubrid-iw, mmugreɣ-d aṭas n tkerrusin ḥebsent, ur zmirent ara ad ddunt deg usalu n udfel yessan.
Uliɣ-d tasawent yettawin ar wanda ḥebbsen yifurguten. Abrid yecceḍ, uliɣ kan s ttawil. Walaɣ ɣef zelmeḍ snat n tlawin ḥnuccgent. Walaɣ tikerrusin tteḥluccugent, ta tettnal tayeḍ, ttemṭerḍaqen gar-asent.
Mi wwḍeɣ ɣer umkan, ulac ula d yiwen ufurgu. Fecleɣ, walaɣ ssaɛa acḥal tewweḍ, d zzuǧ d uzgen n tmeddit. Ttmuquleɣ anda ara waliɣ amdan, ulac ula d yiwen, ur yettnuḥ. Weḥd-i ala nekk d zzher-iw.
https://sadbendali.blogspot.com/2022/01/adris-ufrin-arraz-wis-2-ikziku-ayyur-n.html
Commentaires
Enregistrer un commentaire