Abeḥri n taddart
sɣur Malika Tagawawt
Zrin wussan d yiseggasen. Ruḥent tsutwin, usant-d tiyaḍ. Taddart yellan d taremmuɛt n yexxamen yedduklen deg yiwet n tiɣilt, ass-a tennerna. Udem-is yennecṛaḥen, yebrarḥen, ur t-yerni ara wakud. Xas akken aṭas n tedyanin umi d-yecfa, llant tid i d-yuɣen aẓar seg yiḍelli, mazal-itent ar ass-a. Llant tigad i d-yettlalen ttmettatent din din.
Taddart n wass-a, tewwi amur-is deg lebni atrar. Ixxamen feṣlen s yiɣaniben i d-yekkan di tuget si tmura n Turuft. D lebṛuj n Cinwa, kṛad wannagen terreḍ akkin. Meɣɣin-d am treɣlin, segmi yettwakkes wemkan i tzeɣwin n wakal d wejdar. Kksen amkan i uqermud d yijga, isulas, addaynin, takanna, lkanun. Yenqedwa utemmu d yiɛecciwen. Kra din yeggra-d ḥaca deg waktayen n wid i yeddren tallit-nni taqburt.
Axxam n wejdar yegrurej, ǧǧan-t yimawlan-is, tezdel fell-as tsusmi d tasmuḍi, teffeɣ-it tudert. Meɛna, acu ur nbeddel ara di taddart, yerna ur cukkeɣ ara ad d-yas wass i deg ara ibeddel, d abeḥri-nni n tnezzayt. Abeḥri-nni yeslafen i tudert mi ara d-tekker yal tafejrit. Abeḥri-nni idehnen tiɣaltin yal mi ara d-yali wass. Mi ara d-yenqeṛ yiṭij, ad d-taɣ tafat i d-ttaken yizenẓaren -is i icuban aggus n wureɣ.
Abeḥri-nni yesduqqusen, i d-yettaken tabɣest d wafud i yemdanen akken ad d-mmagren ass-nsen akken yebɣu yili. Rriḥa-ines, tettaweḍ ɣer telqey n yiman, tesbuḥruy i wallaɣen. Abeḥri-nni, ur tezmireḍ ara ad t-tafeḍ anda nniḍen. Ulac ! Xas yella ubeḥri maca tiẓeḍt-nni-ines temgarad.
Abeḥri n taddart i wat taddart. Ḥaca nitni i yegzan anamek-is d wazal-is. Xas unagen, yewwi-ten wakud s anda nniḍen, maca yiwen wass kan, ad d-ḥedlilfen. Yiwen wass kan, ad d-steqsin. Yis-s i ssiriden urrif d nnhati-nsen. Seg-s i d-ttagmen tikta mellullen i asen-yemmalen tanila-nsen. Yis-s diɣ i zellun tiḥizit i ten-iḥerran di teɣṛibt-nsen.
Abeḥri n taddart yessilqiq ulawen, iteẓẓu deg-sen tagmat d tdukli. Yettarra tawwurt ɣef uqebli n lmerta, yessawal i rrezg d tumert. Yettawi-d ɣer yal tameẓẓuɣt izlan n tlelli.
Ahat, kra seg-wen, ma mačči tuget ad tdessem ɣef yimeslayen-iw, ad as-tinim d ashetref. Yezmer lḥal. Maca nekk ɣur-i, d aḥulfu ẓiden, d tamuɣli zeddigen. Ẓriɣ d akken yal yiwen deg at taddart iḥulfa s waya, xas ulamma i tallit meẓẓiyen maḍi. Abeḥri n taddart, mačči d abeḥri-nni i yessmwiwilen iferrawen n yisekla d yimɣan kan. Mačči d abeḥri-nni yeskawen tidiwin i d-yeǧǧa wurɣu n yizilan. Ala !…
Abeḥri n taddart, d win yessemwiwilen iɣuraf n tdukli d tegmat, mi akken tesbur fell-asen tsusmi n beṭṭu. D netta i itekksen asergel i teɛwint akken ad tsew aẓar n talwit. Abeḥri n taddart, yessebririḥ allen i wigad-is, akken ad d-myeɛqalen, akken ad d-ttun ccḥani d ddɣel i ten-yebḍan am yibawen ɣef lluḥ . Nekk, d netta i iyi-ineǧṛen tiregwa i tirga-w yettarran awal d asefru :
Suḍ ay abeḥri n taddart
Commentaires
Enregistrer un commentaire