Yennayer (asefru)

Yennayer mi d-yeflali 

S usfuggel ad t-nemḥawaq 

I Ramsis terreẓ tiddi 

Mi ihudd tagelda-s Cacneq

Timiḍt di Tmazɣa i as-teɣli 

S tissas iɣerreb iceṛṛeq 

Amezruy yak d anagi 

Ur mazal ad aɣ-yeεreq 

Xas lateṛ teǧǧa-t tikli 

Yerra-d iqadden i umeccaq 

D 2972 i d ass-agi 

Mazal tarwa ad- tebbeεzeq 

Awnis n wakal d yimɣi 

I tdamsa i d-iṛecceq 

Yal tagella ad tt-nheyyi 

Amɣar yewwi-d si leswaq 

Tislit teseww aseqi 

Ayaziḍ yewwa s leḥbeq 

Berkukes am ubruri 

Zewwaɣ s zzyada imeṛṛeq 

Lemsemmen ɣef uḍebsi 

Aḥeddur ad iweṛṛeq 

Lluz d lǧuz d afruri 

Tamɣart mi tεedda tfeṛṛeq 

Tament tefsi deg wudi 

Aɣrum yewwa di fedṛeq 

Rrfis d ttmer d asefsi 

W'ur t-nečči ad icehheq 

Γef wuftiyen nettweṣṣi 

Aqeddid ad yelleqleq 

Taqcict tzewwi lḥenni 

Tafettust am yilizeq 

Abernus d afilali 

Yelsa-t lbaz imṛemmeq 

Ad yimɣur ad yettṛayi 

Mi teṛεed ad ibeṛṛeq 

Nnafex am usebsi 

Ini, lkanun yeddeqdeq 

Tafeggact aɣ-d-tettwali 

Γer tesga i t-cudd tεelleq 

D tameɣra ar Tiniri 

Ifukk laẓ ifukk jjeq 

Nesla i wurar n Tindi 

D yimi mi d-yesseqseq 

Yezdi Utergi d Urifi 

Γer Siwa i d- ncewweq 

Amaziɣ Amuriṭani 

Di Mali i nemyectaq 

ΓerTeknaṛiyin nettεenni 

Tilisa wallah ma ilaq 

Ass-a yusa-d d inebgi 

S tayri ad t- nemḥedwaq 

Mi d-nelḥa tnac di tikli 

Γef umnaṛ ad nemfaraq 

Tawwurt fell-aɣ ad d-telli 

Am umeqqran d uleqaq 

Yennayer-agi d asaεdi 

Wi aɣ-yugin ad-inafeq!

 

Tura-t Louisa Kaneb, i tutlayt-inu

https://sadbendali.blogspot.com/2022/01/yennayer-asefru.html