Tanelmadt n master n Tmaziɣt, talɣuɣt taɣelnawt deg waddal n Taekwondo
Acḥal telliḍ deg usemmud-im mi tebdiḍ addal?
Mačči zik i bdigh addal imi ur iyi- tettunefk ara tegnit armi sεiɣ 16 yiseggassen di leεmer-iw. Annect-a, ur t-ufiɣ ara d ugur.
Ayɣer i tferneḍ addal n TaeKwondo?
Taekwondo, lliɣ ur t-ssineɣ ara. Nekk, seg wakken ur iyi tettunefk ara tegnit ad kecmeɣ ɣer waddal zik, bɣiɣ addal n umennuɣ. Ruḥeɣ ɣer tzeqqa n waddal anda tturaren, seqsaɣ ɣef waddal n umennuɣ. Imi di tallit-nni ḥemmleɣ amennuɣ, ufiɣ ala taekwondo i yeffɣen fell-i ɣef lweqt . Dɣa ruḥeɣ bdiɣ deg-s ufiɣ-t yeεǧeb-iyi, kemmleɣ, ar assa mazal-iyi.
Mmeslay-aɣ-d ɣef usluɣmu-inem. Acḥal tikkal deg yimalas? Anida?
Xeddmeɣ 3 tikkal deg yimalas di terbaεt timeddiyin ɣef 17:30, maca tikwal rennuɣ asluɣmu weḥd-i deg complexe sportif n Friḥa .
Tagella d yiwen uferdis axatar ɣer unaddal n uswir unnig. Ahat tesεiḍ kra n wučči uzzig swayes tḥerzeḍ talɣa-m d tzemmar-im tinaddalin?
Tagella, d aferdis agejdan akked tguni, imi ttεawanen aṭas anaddal. Yella ulugen amek ara yečč iwakken ad yili di tdawsa yelhan. Yella wacu ur nlaq ara i tfekka n unaddal. Daɣen, ad itess aṭas n waman.
D anta-tt teɣlamt-im? Amek yedda umecwar-im anaddal?
Tarbaεt, isem-is "amis taekwondo Freha" {ATF}. Amecwar-iw anaddal yusa-iyi-d yewεer nezzah, maca ṭṭfeɣ deg-s, nuḍḥeɣ ayen din (ulac ttawil).
D acu n talɣuɣiwin ideg i d-tufrareḍ?
Yal mi ara tili talɣuɣa taɣelnawt n Zzayer, ttifrireɣ-d ger 3 yimeḍqan imezwura.
2018: amdiq wis 2 di talɣuɣa tasdawant, di Bab Zwar (Zzayer)
2018: di Tizi Uzzu.
2019: di Ṭṭerf:
2019: amḍiq wis 3, di tzeqqa Ḥerca (Zzayer) - Lliɣ rẓeɣ deg ufus.
2021: amḍiq amezwaru, di tzeqqa Ḥerca (Zzayer tamaneɣt)
2022: amḍiq wis 3, di tzeqqa Ḥerca (Zzayer tamaneɣt)
Acu d asirem-im agejdan deg waddal?
Asirem-iw, ad iligh d talɣuɣt n umaḍal, ad yifrir usenǧaq n tmurt-iw ger tmura. Ssarameɣ daɣen sya ɣer zdat ad uɣaleɣ d taselmadt n waddal-a taekwondo.
D acu n uẓawan i tḥemmleḍ ad tesleḍ?
Aẓawan, selleɣ i wayen yellan maca di tewsit n cceεbi i ttafeɣ iman-iw.
Amek tga tmuɣli n tmetti ɣur-m?
Di tesdawit, di berra…?
Γur-i tamuɣli ama di tesdawit ama di berra ur teshil ara, ddu d uḍar-ik εass iman-ik.
Ma nuɣal-d ɣer Dihya tanelmadt, anwa aswir iɣer tleḥqeḍ?
Qqaregh master 2 di tesdawit.
Tazwara, d imawlan-iw i iyi-igan isem amaziɣ - Dihya. Tin i tent-yugaren d nnif akked leḥmala, imi ttuεayreɣ ɣef tutlayt-a.
Mačči d ayen isehlen i tnelmadt n M2 akken ad ternu addal ger yisluɣma d uttekki di talɣuɣiwin tinaddalin i yettawin aṭas n wakud?
Ih, mačči d ayen isehlen imi leqraya teḥwaǧ akud, addal daɣen yeḥwaǧ akud.
Lameεna εerḍeɣ bḍiɣ-t: azgen i leqraya, azgen i waddal.
Amek i tessawaḍeḍ ad as-tafeḍ ixef ger snat taɣulin? Amek tzeddiḍ gar-asent?
Nuḍḥeɣ fell-asent dii snat: leqraya ṣbaḥ akud akk i nettat, tameddit i waddal. Maca mi d-leḥqen yikayaden ttakreɣ ciṭ i waddal rennuɣ-t i leqraya. Mi d-telḥeq talɣuɣa, ttakreɣ si leqraya rennuɣ-t i waddal. Akka uɣaleɣ wulfeɣ tura, tusa-iyi-d d taɣawsa isehlen . Di tazwara kan i-iyi-yewεer.
Amek i ttwalin yinelmaden tamdakkelt-nsen tanaddalt Dihya talɣuɣt?
Tthibin-iyi, ttagaden-iyi, maca win i d-iqerrben yeẓra-yi amek giɣ, yettaf-d tamuɣli nniḍen.
Acu d aḥulfu n yimarawen-im s yelli-tsen tanelmadt, daɣen talɣuɣt?
Imawlan-iw ferḥen yis-i, refden aqerru-nsen s wayen xeddmeɣ. Ala nekk i yellan d tanaddalt di taddart neɣ am uqcic am teqcict.
Ad asen-iniɣ tanemmirt-nwen ɣef wayen i iyi-txedmem Di tudert-iw yis-wen i lliɣ, assa yis-wen i leḥḥuɣ ɣer zdat! lxir-nwen ala Rebbi ma yezmer-as.
Ini-d awal ɣef ublug-nneɣ "tunt-inu".
Tabɣest igerrzen ara idummen, ara yesnernin deg uxeddim-nwen . Teḥya-m-d tutlayt-nneɣ tesjuǧǧgem-tt. Tanemmirt-nwen.
Tadiwennit, yexdem-as-tt S-Bendali.
https://sadbendali.blogspot.com/2022/03/tadiwennit-akked-dihya-bouarab.html
Commentaires
Enregistrer un commentaire