Tadiwennit d unaẓur acennay Akli Begric

Anaẓur acennay Akli Begric ijebden iman-is seg unnar n ccna kra n wakud, am wakken d asgunfu kan i yesgunfa. "Asgunfu-a", yegzem-it di tefsut yezrin s yiwet tezlit tabidyut igerrzen aṭas, i ibudd i "Teqbaylit". Deg unebdu-a, yerna-d yiwen walbum d amesbaɣur n yisental. Di tallit i deg "yekkussem" uẓawan amaziɣ aqbayli atrar, Akli yuɣal-d s yiwen umahil yettwaxedmen s wul, tezdeg akked tarrayt. Di tazwara n tdiwennit-a i nexdem yid-s, ha-t-a wamek i d-yessenked iman-is:  D aselmad, d anaẓur n teklut, d acennay n tezlatin s teqbaylit. Luleɣ ass n 27 Yennayer 1961 deg wat Wagnun. Taddart-iw d "Tala Ggeḥya" di tɣiwant n At Ɛisa Mimun.

Tutlayt-inu: Melmi yebda umecwar-ik n  ccna d uẓawan?

Akli Begric: Si temẓi n temẓi-w i yi-tekcem tayri n ccna. Sakkin, lemdeɣ  snitra almi d-ufiɣ yiwwas iman-iw d acennay. Ccna ɣur-i, d targit yeffɣen.

Tutlayt-inu: D acu (neɣ d anwa) i k-yesbeɣsen akken tuɣaleḍ d acennay?

Akli Begric: Di lawan-nni, ulac tagi n usebɣes: d iman-iw kan.

Tutlayt-inu: Kečč seg wid icennun tizlit taqbaylit tatrart. Amek armi tferneḍ tawsit-a n uẓawan?

Akli Begric: D ddkir i yellan gar-i d ccna atrar. Srid rriɣ ɣur-s acku deg-s i ttafeɣ aɣanib i iwulmen tamedyezt-iw.

Tutlayt-inu: Anwa i d acennay aqbayli neɣ aberrani i tettwaliḍ d amedya-inek?

Akli Begric: D tizlatin n Yidir fell-as talwit  i lliɣ cennuɣ si zik deg tmeɣriwin. D netta i-d amedya-inu.

Tutlayt-inu: Ahat llan yicennayen iqbayliyen neɣ wiyaḍ (seg wid i k-yezwaren), i tḥemmleḍ neɣ i tesmenyafeḍ. D anwi-ten?

Akli Begric: Ḥemmleɣ akk icennayen acku ḥemmleɣ akk ccna s umata, gemmreɣ am tzizwit tamment.

Tutlayt-inu: Acu d taɣawsa swayes tettwakazeḍ deg uɣanib-ik n uẓawan?

Akli Begric: Ṣṣut n tgiṭart  "accoustic", d ṣṣut aḥnin ijebbden tameẓẓuɣt, ɣef waya t-giɣ d lebni deg uẓawan-iw atrar.

Tutlayt-inu: Ansi i ak-d-tettas tehregt, ama deg uẓawan, ama deg uḍris?

Akli Begric: Si tudert n yal ass akked tirmi.

Tutlayt-inu: Kečč iḥebsen ccna aṭas yiseggasen, amek tḥulfaḍ di tuɣalin-ik?

Akli Begric: D tumert taḥerfit. Ayen i yi-yessumren d imsefliden-iw i d-ufiɣ assa ɣer umnaṛ ttraǧun-iyi, ur iyi-ttun ara yernu cfan akk i teqdimin-iw.

Tutlayt-inu: Seg yisental iɣef tecniḍ zik: tayri (kemm), asirem di tudert (aki d yiman-ik); tezriḍ ɣer tmagit (ur nelli d atmaten). Tineggura-a, am wakken triḍ ad tazneḍ izen iǧehden i tmurt n Leqbayel i k-id-yefkan. D acu-t?

Akli Begric: Izen : A taqbaylit. Taqbaylit, d tutlayt-nneɣ n tyemmat. Taqbaylit, d tayemmat i aɣ- yurwen d irgazen,  d-iqbayliyen.

Tutlayt-inu: Deg useggas-a, tessuffɣeḍ snat tezlatin igerrzen aṭas: Tamezwarut, d Taqbaylit; tis snat, d abrid ɣer udrar. Mmeslay-aɣ-d fell-asent.

Akli Begric: D isental i iyi-yellan aṭas aya deg wul dɣa assa yewweḍ-d wass-nsen, ffɣen-d.  D tasemɣurt i tutlayt, d tasemɣurt i tmurt n Leqbayel yeffulkin.

Tutlayt-inu: Akli, mačči kan d acennay. D acu nniḍen i txeddmeḍ di tudert-ik?

Akli Begric: Lliɣ d aselmad n teklut, am wakken xeddmeɣ di tesnurayt n udellel ar tura.

Tutlayt-inu: Arrac imaziɣen imeẓyanen "i yettɣaḍen aṭas" imi lemmden, cennun tizlatin s tutlayin nniḍen. Xas bɣan ad lemden, ad cnun s tutlayt-nsen, wissen ma ad afen tizlatin i asen-yettwarun! Dacu i d tamentilt n way-a?

Akli Begric: Ilaq s tidet, ad nerr azal i tezlit n yimeẓyanen (ɣef yimeẓyanen), maca urεad neṣṣaweḍ ad nexdem am wakken xeddmen deg tmura tijenṭaḍin. Dihin, ẓran d akken d arrac i d llsas n tudert n uzekka, yernu aẓawan d tagella n yiman. Ccna i yimeẓyanen d aswir s wazal-is, lemmer tegza tmetti.

Tutlayt-inu: Mi ara selleɣ i tezlatin-ik, taɣect-ik ḥninen aṭas, d uẓawan-ik yessecrahen tameẓẓuɣt, tettas-iyi-d tekti, ad ak-tt-id-fkeɣ d asteqsi-a: melmi ara tecnuḍ i warrac-nneɣ imeẓyanen? 

Akli Begric: D asenfar igerrzen, ayɣer ala? Awi yufan akud… Maca llant kra n yiḍrisen yettraǧun tafat.

Tutlayt-inu: D acu-ten yisenfaren-ik i yimal uqrib?

Akli Begric: Ccna, tamedyezt, taklut akked tira. Ad d-rreɣ "iklipen" i yal tizlatin-iw akken ad d-ggrin i lebda.

Tutlayt-inu: Awal-ik n taggara, ssiweḍ deg-s izen i wid tebɣiḍ, i tḥemmleḍ.

Akli Begric: Ssarameɣ wwiɣ-d abruy n sserr i teqbaylit-iw. Ssarameɣ album-iw n wussan-a ad yeεǧeb akk wid i as-yeslan. Mazal ad necnu, mazal ad nessirem ad lhun wussan.

Tutlayt-inu: D acu i d tamuɣli-k ɣef ublug "tutlayt-inu"?

Akli Begric: Ablug  d win yessebɣasen, d win d-yettarran asirem d akken mazal wid iqeddcen ɣef teqbaylit s teqbaylit di yal taɣult. D aɣerbaz, deg-s nlemmed. Ssarameɣ-as afud uzmir.  Tanemmirt-ik a mass Bendali

Tadiwennit, iga-tt S.Bendali

https://sadbendali.blogspot.com/2022/09/tadiwennit-d-unazur-acennay-akli-begric.html