Tameddurt-is:
Nuṛa Ibeknusen, d yiwet tlemẓit i d-yekkren di taddart n Yiɣil Umsed, taɣiwant n Yicellaḍen, aɣir n Bgayet. Teɣra di tesdawit Ɛebderraḥman Mira n Bgayet, anida d-tewwi turagt (licence) s tutlayt taεrabt di tesnalmudt, deg useggas 2014. Ma deg useggas n 2016, teffeɣ-d s umastir deg tussniwin n umeslay.
Xas akken ur teɣri ara Tamaziɣt-deg uɣerbaz maca, seg wakken tḥemmel-itt aṭas, tezdeɣ-as ul d wallaɣ; telmed-itt s yiman-is. Ama s yidlisen n Tmaziɣt i teqqar, neɣ s wallal n yiẓeḍwan inmettiyen, ladɣa facebook, tessaweḍ armi tesεa aswir igerrzen di tira n tutlayt-is tamaziɣt taqbaylit. Di ddeqs n yigrawen n FB, nettaf tibedrin-is d yinzan i d-tgemmer Nuṛa tafat di twacult-is.
Imi d tin yuklalen asebɣes ɣef leqdic-is, neɣtes ad d-nessuffuɣ d iḥricen inzan n lejdud i d-tettagem si tmetti . Assa! aql-aɣ ihi neldi ixef amaynut iwumi nsemma "inzan-nneɣ" ara yilin yeldi akk i wid d tid ilan inzan, ad ten-id-rnun deg ublug-nneɣ "tutlayt-inu".
Inzan ɣef tsusmi:
- Akken yella yir awal, i tella yir tasusmi.
- Awal d lfeṭṭa, tasusmi d ddheb.
- Limer tasusmi d cci, tili agugam d amerkanti.
- Susem, neɣ ini-d ayen yifen tasusmi.
- Tasusmi sdat n lbaṭel, tessawal i ddel.
- Tasusmi d zzin n yimi.
- Tasusmi teɣleb tamussni.
- Tasusmi txeddem leqder.
- Win walan iḥemmel tasusmi, ad nwun ifent di tmussni.
Nuṛa Ibeknusen
Inzan ɣef yiles:
- Ulac i iẓiden am yiles, ulac i irẓagen annect-is.
- Ay iles yellan d aksum, d acu i k-yerran d asennan?
- Ay iles yellan d leḥlu, d acu i k-yerran d lqares?
- Bu yiles, medden akk ines.
- Iles yettḥawal-itent, aqerruy yettaɣ-itent.
- Iles-is d uḥdiq, ul-is d uḥriq.
- Iles-is / aqemmuc-is d amger, ifassen-is d nnger.
- Iles-is / aqemmuc-is d afuḥan, yerna iɣil akiwan.
- Tebrek n wul i yerran iles d asennan.
Nuṛa Ibeknusen