Asefru si tmedyezt n Racida Bensidhum
TameslaytAhat ma nniɣ-d ad ɣelḍeɣ
Ayen akken iɛeddan ifut
Ur ufiɣ i wumi ara sleɣ
D imdanen tezdeɣ tatut
Yiwen yetbeɛ cciεa
Wayeḍ yeṭṭef di tlufa
S lekdeb i yettgalla
Yegzem lǧeṛṛa i lmut
Ur ufiɣ d acu ara d-iniɣ
Kukraɣ iles-iw ad yecceḍ
Ula d ayen akken gguniɣ
Ar tura yugi ad d-yaweḍ
Aki-d ay amdan n zik
Iwakken ad aɣ-temleḍ abrid
Kker-d rfed-d lqedd-ik
S lhiba-k ara nirid
Aki-d i wakken ad aɣ-d-teḥkuḍ
Ɣef tmeslayt n lejdud
Yewwi-tt waḍu mi d-isuḍ
Yekkes-as aqelmun i ugdud
A win iḥurben anida-k
Ini-d ma tewweḍ-n tiɣri
Anida-t ubrid n leslak
Ad t-netbeɛ ad naf tili
A win yefkan idammen-is
Ttxil-k nfu lxuf seg-neɣ
La yessemɣar afriwen-is
Nugad deg-neɣ ad yezdeɣ
A Dda Lmulud a yitri
I yecban ula d aggur
Lli-d allen-ik ɣas wali
Lebḥer n usirem yeqqur
Ur neẓri d acu ad d-nini
Nettɛawad timucuha
Ma s tidet neɣ d atihi
Nugi ad d-naki si tnafa
A Dda Sliman ɣas nṭeq-d
S snitra-k hder i udrar
D lesnin ur t-yeẓri ḥed
Ccuk yenneḍ-as am uzrar
Ahat lwerd ad yemɣi
Tameslayt-nneɣ ad tidir
Dda lwennas ɣas yeɣli
Tuɣac-is dayen i d ddkir.
Racida Bensidhum
Igerrez
RépondreSupprimerTanemmirt
Ad am yaafu Rebbi
RépondreSupprimerTanemmirt à massa
RépondreSupprimer