Lyazid WERDI: aselmad amaru iqeddcen seg wul ɣef tutlayt-is

Lyazid Werdi, d ilemẓi d-yefrurin deg udrum n Yirubaḥ n taddart n Tnewwart, taɣiwant n Umalu di lεec n At Yiraten. Ur yelli ara kan d aselmad n tmaziɣt, maca, tlul-d deg-s tayri n tira. Yerfed imru -ines i tikkelt tamezwarut akken ad iqabel lexsas yellan,  win yemmuger deg uselmed n tutlayt deg uɣerbaz alemmas anida yesɣer azal n 13 yiseggasen. Iḍrisen-is imezwura, ffɣen-d deg tesɣunt “aselmad”.

Lyazid Werdi, yeɣra di tesdawit n Lmulud Mεemri, Yewwi-d agerdas n turagt n tutlayt d yedles amaziɣ deg useggas n 2007. Ma d agerdas n Mastir deg tsekla tasugnant deg useggas 2022. Adlis-is amezwaru i d-yessuffeɣ, d abruy seg tsekla tagraɣlant, yuǧew-it-id seg tɣuriwin-is i yedlisen yuran s tefransist d tneglizit. Yerra-asen amsasa, yessuqel-iten-id ɣer tutlayt-nneɣ, imudd-asen udem ucbiḥ n teqbaylit. Yeffeɣ-d 2020 ɣer tezrigt imru, yesεa azal n 125 n yisebtaren, ad naf deg-s ddeqs n yeḍrisen ara yiḥwiǧ uselmad n tmaziɣt deg ulmud-ines.

Syin akkin, ilul-d udlis wis sin s uzwel " gar yefyar " .Yewwi-aɣ-d deg-s ayen nnan d wayen yeffren gar yefyar n usefru deg uḥric amezwaru. Ma d aḥric wis sin, ad naf deg-s inzan d tebdar n yimussnawen imeqqranen n umaḍal, yessuqel-iten-id ɣer teqbaylit. Adlis-a, yesεa 96 yisebtar, yeffeɣ-d ɣer teẓrigt talsa deg useggas 2023.

Tutlayt-inu tuẓa ɣer umaru, testeqsa-t ɣef wayen i as-irennun afud d lḥir deg umecwar-ines n tira.  Yenna-d : Tidet kan, ayen iyi-irennun afud d tebɣest d imeddukkal-iw imura d yimeɣriyen s umata, ttakken-iyi-d tabɣest akken ad dduɣ ɣer sdat. Γef tuttra n tutlayt-inu i mass Werdi ɣef umaru neɣ amedyaz yessaɣen deg-s leḥrara n tira d unadi, yenna : 

Tiririt ɣef usteqsi tewεer acku imura-nneɣ d yimedyazen-nneɣ, ufraren akken ma llan, yal adlis ara ɣreɣ irennu-iyi-d tamussni deg yidles-nneɣ. Maca, imi netta d abrid n tasuqilt i yefren ugar di tira-s, yebder-d Muḥend U Yeḥya ( Muḥya), yenna i ḥemmleɣ nezzeh, ama d tisuqilin i iga neɣ d tamedyezt-is i cnan yinaẓuren-nneɣ imeqqranen. Yerna yenna di tririt-is, diɣ ttagmeɣ-d seg yisefra n Si Muḥend U Mḥend. Qqareɣ s tuget idlisen n Lmulud Mεemmri abeεda wid n ugmar n tgemmi am isefra iqburen n Leqbayel.Ttagmeɣ-d diɣ seg yittafettaren n Belεid At Ɛli…

Ma yella d ungalen, ddeqs i ɣriɣ s teqbaylit d tefransist ; seg Lwali n udrar n Belεid At Ɛli, askuti n Saεid Saεdi, asfel d faffa n Racid Ɛellic, iḍ d wass n Ɛmer Mezdad armi d tiṭ d yilleḍ n Muḥend Akli Salḥi, iɣef giɣ aktay n Mastir di 2022.

Mi nesteqsa amaru ɣef wuguren d-ttmagaren yimura d yimedyazen, yenna-d : imyura ttmagaren-d uguren yal ass, amenzu deg-sen d lexsas n tedrimt d ttawilat n usigez. Rnu isuḍaf,  ur ten-neǧǧi ara ad d-suffɣen tiktiwin-nsen akken bɣan . Akken daɣen adlis amaziɣ/ aqbayli ur yeffiɣ ara ɣer yigezda -niḍen , imi tuget n wid itteffɣen d wid yuran s tutlayin niḍen. Maca xas akka ṭṭuqten wuguren, imura-nneɣ wwin abrid s lḥir d ufud meqqren d wudem n tayri d tmeɣnest.

Tamuɣli n umaru Werdi ɣer wahil unsib n uselmed n tmaziɣt d tin leqqayen, yenna belli yella wayen ifazen, akken yella daɣen lexsas. Γef waya tlaq tmuɣli s telqey d uskasi  ideg ara tttekkin yiselmaden/ tiselmaden i yellan deg wannar n uselmed, akken ad d-inin awal-nsen walan ad yeqqim d wayen ara ibeddlen. Ma nefka-d amedya, laqen yeḍrisen ara ijebden lwelha n unelmad akken ad ten-iɣer, ad d-slalen deg-s lḥir akken ad yiḥmil taɣuri d tutlayt s umata.

Mi nesteqsa amaru Lyazid Werdi ɣef yisenfaren i d-yettheyyi, yenna -d d akken yennayer-a ad d-yeffeɣ udlis i yurz d mass Racid Isaεdi i wumi isemma " Tazabut" . Akken daɣen i d-yessewjad yiwen wungal ara d-yeffɣen deg wayyuren i d-iteddun, d tasuqilt i iga i yiwen n udlis yuran s tefransist. S wakka, Tutlayt-inu, tettraǧu s taḍfi kra n wayen ara d-yeffɣen d amaynut di tsekla-nneɣ, isebtar-is ldin akk i yimura d yinaẓuren imaziɣen.

Tutlayt-inu

https://sadbendali.blogspot.com/2025/01/lyazid-werdi-aselmad-amaru-iqeddcen-seg.html