Milisa AMALU: Tamedyazt tilemẓit yeččuren d asirem

 Milisa Amalu neɣ “Tajeǧǧigt n meɣres”, d tamedyazt tilemẓit s yiles amaziɣ, d tanelmadt di tesdawit Mulud Mεemri n Tizi Wezzu. Tla 23 yiseggasen deg usemmud, d yelli-s n temnaḍt n Yiεeẓẓugen.

 

Tutlayt-inu: Amek i d-tesskefleḍ tamedyezt, acu kem-yerran tḥemmleḍ-tt?

Milisa Amalu: Skefleɣ-d tamedyezt asmi sεiɣ 15 n yiseggasen, faqeɣ i yiman-iw d akken hemmleɣ tamedyezt, maleɣ ɣur-s aṭas, ttertiḥiɣ mi ara ttaruɣ. Si zik-iw, hemmleɣ ayen yeεnan tasekla, ttnadiɣ ad ẓreɣ ugar ɣef taɣult-a .

Tutlayt-inu: Acu i am-yettmuddun tahregt i tira n yisefra?

Milisa Amalu: Ayen iyi-ttmuddun tahregt i tira n yisefra d imedyazen n tmurt n Leqbayel, d ayen ddreɣ, d wayen ttwaliɣ di tmetti.

Tutlayt-inu: D acu n yisental iɣef d-ttawin yisefra-m?

Milisa Amalu: Isental i ɣef d-ttawin yisefra-w d timetti, zemreɣ ad iniɣ daɣen d iwellihen i yemdanen ladɣa arrac imecṭaḥ.

Tutlayt-inu: Glem-aneɣ-d amek i d-ttlalen yisefra-m?

Milisa Amalu: Ttlalen-d yisefra-w mi ara ṭṭṣen waman d yesɣaren; lmeεna-s, deg yiḍ mi ara tessaɣ tsusmi,  Milisa ad tebdu tira n usefru. 

Tutlayt-inu: Tessuffɣeḍ-d yakan ammud n yisefra, mmeslay-aɣ-d cwiṭ fell-as.

Milisa Amalu: Ammud-iw n yisefra semmaɣ-as Agerruj, deg-s 33 n yisefra. Gar yizwal yellan daxel-is: tiɣri n ufennan, tameṭṭut, aɣewwaɣ, seg wul ɣer wul, tagmat. d tezwart yura Mass Ferhat d Mass Aliche. Semmaɣ-as agerruj,  acku asefru d agerruj ur nfennu; d tikci n Rebbi, ala win iḥemmel iwumi tt-yefka.

Tutlayt-inu: Acu i kem-yessbeɣsen akken i t-id-tessuffɣeḍ? Acu n yizen i triḍ ad tessiwḍeḍ yis-s?

Milisa Amalu: Ayen iyi-yessbeɣsen akken ad t-id ssuffɣeɣ d leḥmala-w i tutlayt n tyemmat, d laḥrara i sɛiɣ daxel-iw ɣer tiddin ɣer sdat di tẓuri imi d azgen si tudert-iw. 

Izen i bɣiɣ ad t-id-ṣiwḍeɣ d akken, di tudert yella rrbeḥ, tella lexṣara. Amdan ma yeɣli, mačči d tagara n ddunit maca d tazwara niḍen, d ayen ara as-yefken tabɣest ad yeddu ɣer sdat ad yesseɣti tuccḍiwin-is. 

Daɣen d tajmilt i yinaẓuren imi d nutni i d lemri n tmetti yis-sen i nessegzay timsal yeffren deg-s.

Tutlayt-inu: Ayɣer i tferneḍ ad taruḍ s tutlayt tamaziɣt s tsenfelt-is taqbaylit? Acu d tamuɣli-m ɣer usfari-nnes deg yimal?

Milisa Amalu: Xtareɣ ad aruɣ s tutlayt tamaziɣt s teqbaylit acku d tutlayt-iw hemmleɣ-tt; idammen-iw d iqbayliyen yerna mazal tuhwaǧ-aɣ akken ad tt-nesnerni.

Tutlayt-inu: Iwumi tettaruḍ isefra-m (acu n uɣref)? 

Milisa Amalu: Ttaruɣ isefra i yal amdan di tmetti,  ama d amecṭuh, ama d ameqqran, wid ihemmlen isefra s teqbaylit.

Tutlayt-inu: Amek i ttmagaren yimeɣriyen-im tamedyezt-im?

Milisa Amalu: Imeɣriyen-iw ḥemmlen tamedyezt i ttaruɣ, sebɣasen-iyi ad kemmleɣ ɣer sdat; ttḥirin ad d-yeffeɣ umaynut-iw akken ad t-ɣren.

Tutlayt-inu: Di facebook, nettaf-ikem tessenkadeḍ tibidyutin tiwezlanin; acu d iswi-inem deg umahil-a?

Milisa Amalu: Iswi-iw si tbidyutin tiwezlanin di fcb, d tilin-iw akken wid iyi-yettabaɛen ad ẓren d akken lliɣ, xedmeɣ i tmedyezt , xas llan wid i yettargun rrwah-iw maca ur ttruḥuɣ ara,  siml0al ɣer sdat .

Tutlayt-inu: Amek iga wassaɣ-im d yimeḍfaren-im n uẓeṭṭa inmetti?

Milisa Amalu: Assaɣ-iw d yimeḍfaren-iw d assaɣ n leqder, ambaddel n tektiwin, tayri i tutlayt d yedles aqbayli .

Tutlayt-inu: Ini-d ma tettwaliḍ iẓeḍwan inmettiyen  d allal yelhan i usnerni n tsekla tamaziɣt s wudmawen-is.

Milisa Amalu: Ih, ttwaliɣ-t d allal i usnerni n tsekla tamaziɣt .

Tutlayt-inu: Anwa amedyaz neɣ anta tamedyazt  i kem-iḥuzan, i tettwaliḍ d amedya-m?

Milisa Amalu: Amedyaz i ttwaliɣ d amedya-w d MATUB LWENNAS,  cebḥent tezlatin-is, leqqayit  yisefra i yettaru, deg-sen aṭas n unamek .

Tutlayt-inu: Wissen, yiwwas, ma ad tuɣaleḍ ad taruḍ ungal neɣ tullisin! Mmeslay-aɣ-d ɣef yisenfaren-im n yimal.

Milisa Amalu: Ih, sewjadeɣ amaynut di tira d wayen niḍen ad t-neǧǧ kan d tamuffirt .

Tutlayt-inu: Ini-d awal ɣef tmeṭṭut d tmedyezt.

Milisa Amalu: Tameṭṭut tamedyazt ɣur-i d tasedda, tessaweḍ ad teɣleb timetti d wayen d-qqaren akken ad t-kemmel i tẓuri, ad tefk ugar i tutlayt-is. Ad iniɣ i yal tin yellan d tamedyazt, kemmel ɣer sdat ur ttendemmay ara kemm d taftilt i d yettaken tafat i tutlayt.

Tutlayt-inu: Ini-d acu d asirem-im, acu d targit-im n tudert.

Milisa Amalu: Asirem-iw ad sufɣeɣ tamedyezt-iw ɣer yal tamurt ad ẓren leǧnas merra d akken tamaziɣt mačči d ulac maca tesɛa ahric d umezruy meqqren di tsekla .

Tutlayt-inu: Ad am-ǧǧeɣ awal aneggaru, azen-it i wid tḥemmleḍ d wid i kem-iḥemmlen.

Milisa Amalu: Awal-iw aneggaru,  ad iniɣ tanemmirt i yal yiwen yal yiwet iyi-yessebɣasen , yal win yefkan azal i leqdic-iw; sarameɣ ad iliɣ di lebɣi-nwen. Aya d tazwara kan, mazal lxir ɣer sdat. Tanemmirt i wid i yettraǧun ad ɣliɣ acku tefkam-iyi-d afud akken ad kemmleɣ wa ad xedmeɣ ayen akken sarmeɣ i tudert-iw .

Tadiwennit, iga-tt S.BENDALI

https://sadbendali.blogspot.com/2025/01/milisa-amalu-tamedyazt-tilemzit.html