Timiḍranin: talɣa, tawuri, taserkemt

Di tjerrumt d tseddast, timiḍranin n talɣa, tawuri akked tserkemt, azal-nsent d agejdan akken ad negzu taɣessa d unamek n wawalen d tefyar.

A. TALΓA n wawal, temmal-d tafekka-s, amek yura neɣ amek i t-nessusruy. Tezmer ad tbeddel ma tbeddel tewsit-is (amalay/unti) neɣ ma ibeddel umḍan-is (asuf/asget) akked waddad-is (ilelli/amaruz); ma yella wawal d isem neɣ d arbib.. Daɣen, ma d amyag, tettbeddil talɣa-s s ubeddel n wudem iɣer yefti (1u, wis 2, wis 3…) akked tmeẓri (izri, urmir, urmir ussid).

B. TAWURI n wawal, d tamlilt-is di tefyirt neɣ acu ixeddem deg-s. Deg umedya, isem yezmer ad yili d amigaw neɣ d asemmad usrid; arbib yemmal taɣara neɣ addad ideg yella yisem (amek iga); amyag yezmer ad yessenfali tigawt.

C. TASERKEMT n wawal, d taggayt tajerrumant ideg yella. Tiserkam n wawalen, d ti: ismawen, imyagen, imqimen, irbiben (igelman), tinzaɣ, imerna…

Ad d-neg tamawt dakken awal yezmer ad yesεu aṭas talɣiwin, aṭas twuriwin akked waṭas tserkam yemgaraden, ay-a ilmend n usatal ideg yemres. Imedyaten:

Γef talɣa:

Awal “awtul”, d isem asuf amalay, “iwtal” d isem asget amalay, “tawtult” d isem asuf unti, “tiwtal” d isem asget unti. 

Γef twuri:

- Awal “tamsirt”, di tefyirt “tekfa temsirt”, d asemmad n umigaw; di tefyirt “nelmed tamsirt”, awal “tamsirt” d asemmad usrid.

Γef tserkemt:

- Awal “amenzu”, di tefyirt “Masil, d aqcic amenzu”, d arbib; di tefyirt “amenzu yekcem ɣer uɣerbaz”, awal “amenzu” d isem. 

Awelleh :

Arbib yezmer ad yesɛu taserkemt n yisem, md : amenzu, aneggaru, ameẓyan ...

Isem daɣen, yezmer ad yesɛu taserkemt n umernu, md : tameddit, tikkelt.

Tamsirt n S.BENDALI

https://sadbendali.blogspot.com/2025/02/timidranin-tala-tawuri-taserkemt.html