Tadiwennit akked tselmadt tamarut Siham Ḥariqencix

 

Deffir tuffɣa n udlis amezwaru n tselmadt tamarut Siham ḤARIQENCIX “Tiɣri n Tudert”, tuẓa ɣur-s tgensast n “Tutlayt-inu”, testeqsa-tt ɣef waṭas n temsal. Ha-tt-a tdiwennit i yeḍran gar-asent:

Ttxil-m ssenked-d iman-im i yimeɣriyen n “tutlayt-inu”?

Isem-iw ḤARIQENCIX Siham, n taddart n Ubizar "Lεerc n Wat Jennad".  D taselmadt n tmaziɣt, deg uswir alemmas .

Tutlayt-inu: Melmi d wamek tebdiḍ tira?

Siham Ḥariqencix: Tira, bdiɣ-tt asmi qqareɣ di tesdawit, deg uswir wis kraḍ. Imir-nni, lliɣ ttaruɣ kan tullisin d timeẓyanin  ɣef tudert-iw.

Tutlayt-inu: Anwa i am-irennun afud deg umecwar-inem n tira?

Siham Ḥariqencix: Wid i iyi-irennun afud deg umecwar-iw n tira, ahat mačči d yiwen mačči d sin,  imi si tama tella twacult-iw,  si tama niḍen daɣen d iselmaden-iw yuklalen leqder.

Tutlayt-inu: Ussan-a, yeffeɣ-d udlis amenzu, hder-aɣ-d s tewzel fell-as?  Acu-t usentel-ines? 

Siham Ḥariqencix: Adlis-iw amezwaru, d ungal, Tiɣri n Tudert.

Deg-s uwiɣ-d awal ɣef ddeqs n yisental i nettidir. Yettmeslay-d Wakli i yellan d abugam, yettales-d yal tadyant umi yeḥḍer di yal tazniqt.

Tutlayt-inu: Acu-t wassaɣ n uzwel d wungal-im ? 

Siham Ḥariqencix: Assaɣ n uzwel d wungal-iw, imi ayen yellan deg-s d isental n tmetti, ahaqel tiɣri-inu tella-d i ubeddel n kra n lecɣal  i wakken ad nedder tudert yelhan, gar-asen : tamuḥeqranit n tmeṭṭut, n uguji,  imenɣi ger watmaten, assaɣ ger yiεeggalen n twaculin…

Tutlayt-inu: Amek tettwaliḍ aselmed n tmaziɣt di tmurt-nneɣ?

Siham Ḥariqencix: Aselmed n tmaziɣt di tmurt-nneɣ, mazal ur yeṭṭif ara amḍiq ameqqran imi mazal ur tekcim ara ɣer ddeqs n waɣiren ar imir-a.

Tutlayt-inu: Amek yezmer uselmad n tmaziɣt ad yettekki di lebni d usnerni n tutlayt ?

Siham Ḥariqencix: Aselmad n tmaziɣt,  ibennu anda ma yella di yal aswir imi dɣa yesselmad tutlayt tayemmat i warrac yerna yesseḥbibir fell-as. Yesnernay-itt ɣer-sen imi d nutni i d taftilt n uzekka. S umata isenkar-d tasuta ara yeṭṭfen di laṣel d tutlayt.

Tutlayt-inu: Acu-t uḥulfu -inem mi-ara tbeddeḍ di tneɣrit sdat yinelmaden-im?

Siham Ḥariqencix: Aḥulfu-inu mi ara beddeɣ sdat n yinelmaden-iw,  d asirem imi yal ass d tamussni tamaynut ara muddeɣ i ugrud.

Tutlayt-inu: Γef wacu i d-yettmeslay udlis-im, mudd-aɣ-d tikti tamatut-ines?

Siham Ḥariqencix: Takti tamatut n udlis-iw : 

D yiwen iḥekku-d ayen i d-yedder di tmetti-nneɣ. Yal lḥara yeḥder deg-s i tedyant, yal tiɣmert tettḍeqqir-d tiɣri i ubeddel. Ddeq-s n yisental ɣef wacu yennuɣna wul, yenwa deg-sen abeddel i tudert iṣeggmen.

Tutlayt-inu: Amek i kem-id-tusa takti akken ad d-tessuffɣed adlis-a?

Siham Ḥariqencix: Takti n usuffeɣ n udlis, akken i d-nniɣ yakan lliɣ ttaruɣ kan tullisin d timeẓyanin, dɣa s leryuy n wid yessnen d wid yellan deg wannar i yi-iwellhen ad t-rreɣ d ungal akken ad d-yeffeɣ, tiɣri ad taweḍ yal imeɣri.

Tutlayt-inu: Anwa amaru neɣ amedyaz i teṭṭafared?

Siham Ḥariqencix: Wid ṭṭafareɣ daɣen mačči d yiwen mačči d sin, imi akken qqareɣ tasrit, ḥemmleɣ-tt. Ḥemmleɣ daɣen tamedyezt. Dɣa ttawil-agi n facebook ddeqs n wid ukkud i yi-d-yessemlal xeddmen tamedyazt tufrar nezzeh.

Tutlayt-inu: Anida nezmer ad naf adlis-im?

Siham Ḥariqencix: Adlis-iw, tzemrem ad t-tafem deg : 

Tnedlist n Freḥa - DAḤMAN, tinedlisin n Tizi Wezzu : CCIX d  YEḤYAWI, tinedlisin n Micli d Larebεa n At Yiraten, tanedlist GURAYA deg Bgayet (Tamdint), tanedlist ṢALḤI di Sidi Ɛic, tanedlist MUḤEND UHARUN deg Uqbu.

Tutlayt-inu: Amek twalad asufffeɣ n yedlisen n tmaziɣt ass-a, d ayen isehlen neɣ yewεer?

Siham Ḥariqencix: Asuffeɣ n yidlisen n tmaziɣt, mačči d ayen isehlen imi amaru yeḥwaǧ win ara as-yefken afud d ufus n tallelt, Md: aseɣti,  d ayen i d-ufiɣ ixuṣṣ deg taɣult-agi-nneɣ.

Tutlayt-inu: Anwa ssenf n yimeɣriyen ara yeɣren adlis-im?

Siham Ḥariqencix: Adlis-iw, uriɣ-t i yal win yebɣan tudert yelhan,  yal win yessaramen ad ibeddel kra.  Mennaɣ izen-iw ad t-fehmen.

Tutlayt-inu: Ahat tesεid kra n usenfar ɣer sdat?

Siham Ḥariqencix: Isenfaren ar sdat…!

Tutlayt-inu: Kemm yellan d taselmadt, d tamarut, acu i d asirem-inem i tutlayt d yedles?

Siham Ḥariqencix: Asirem-iw, am nekk am wiyaḍ ad tennerni tutlayt, ad d-nnulfun yimura di yal taɣult…

Tutlayt-inu: Aseggas-a, tewwiḍ-d tilsizzelt n uduktura ; amek tḥulfad s wannect-a ? Acu-t usenfar ideg ara teddud i usnerni n yedles d tutlayt-nneɣ?

Siham Ḥariqencix: Ih, uwiɣ-d deg wussan-agi iεeddan akayad n uduktura. Asenfar-inu ad yili almend n usnerni n tutlayt.

Tutlayt-inu: Awal-im n taggara i kra n win iqeddcen ɣef tmaziɣt d yedles?

Siham Ḥariqencix: Ssarameɣ afud i yal yiwen d yal yiwet iqeddcen ɣef tutlayt-nneɣ.

Isumar, telqeḍ-iten-id Farida CEBBIRI

https://sadbendali.blogspot.com/2025/05/tadiwennit-akked-tselmadt-tamarut-siham.html