Tajerrumt: imyagen n tɣara

Imyagen, nezmer ad ten-nebḍu ɣef sin yiḥricen: imyagen imugna d yimyagen n tɣara. 

Imyagen imugna ssenfalayen tigawt, md: azzel, aru, sew, kmez, gzem, ečč.

Imyagen n tɣara ssenfalayen taɣara neɣ addad (amek iga kra). Ur mmalen ara tigawt. Tuget-nsen, nessuddum-d seg-sen igelman (irbiben), md: awraɣ si iwriɣ, aẓayan si aẓay, aleqqaq si ilqiq, ahrawan si ihriw.

Taseftit ɣer yizri:

- Di tseftit ɣer yizri, imyagen n tɣara, mgaraden ɣef yimyagen imugna (n tigawt). Ha-t-a umedya n tseftit amyag "ibrik":

•  Nekk berrikeɣ ..............ɣ
•  Kečč berrikeḍ ..............ḍ
•  Netta berrik.    ...............
•  Nettat berriket ............et
•  Nekkni berrikit..............it
•  Kunwi berrikit ..............it
•  Kunemti berrikit...........it
•  Nitni berrikit.   ..............it
•  Nitenti berrikit..............it

Tasemlilt:

Di tseftit n yimyagen n tɣara ɣer yizri:

1. Imataren udmawanen, ttilin kan di taggara.
2. Udem wis 3 n wasuf amalay (netta), ur yesεi ara amatar udmawan.
3. Tella kan yiwet talɣa n usget, amatar-is udmawan d "...........it".

Timawin:

1. Kra n yimyagen n tɣara, am yimyagen imugna, di tseftit ula ɣer yizri (lhu, cmet).
2. Di kra n temnaḍin, taseftit n yimyagen n tɣara ɣer yizri ur temgarad ara ɣef tin n yimyagen n tigawt. Ẓer deg umedya-a:berrikeɣ, tberrikeḍ, iberrik, tberrik, nberrik, tberrikem, tberrikemt, berriken, berrikent.

Sadeq Bendali