Tirga n Yemma Ṭaṭa

Imma Ṭaṭa (akka ay as-ssawalen wat taddart) d yiwet n temɣart yesεan ugar n 80 n yiseggasen di tudert-is. Γas yekna lqedd-is, ɣas akken teǧǧa-tt tezmert-is maca mazal lbaṛaka, teṭṭinnig am uεeqqa n ubelluṭ. D nettat ay qublen tuget n yimezdaɣ n taddart. Ayen yellan deg taddart ad tili yid-s, ama d lferḥ ama d lqerḥ. 

Tikwal, tettεedday ɣef yixxamen, testeqsay ɣef yimezdaɣ war ma yella kra. Teqqar: Ad nemẓer send ad aɣ-tawi lmut tamcumt. Yiwen wass, deg wussan n Rebbi, tamɣart, tger-d abrid ad terzu ɣef kra n twessarin n taddart, ɣas ulac tin wessren nnig-s. 

Tamezwarut iɣef terza, d Nna Lwiza. Ur teqqim ara ɣur-s aṭas maca teswa-d tacrift s tbuεjajin idehnen s zzit n tmurt. Teǧǧa talwit i Nna Lwiza, abrid-is srid ɣer Nna Jaja. Mi tewweḍ ɣur-s tufa-tt tettheggi imekli: tessewway lḥut. Ameslay ifetti gar-asent, iselman ttewwan nnig ukanun. 

Mi wwan, tekker Nna Jaja tessaẓ-as tamejlubt-nni n lḥut i Yemma Ṭaṭa, tenna-as:

- Aweɣ ad teččeḍ a Ṭaṭa!

- Tanemmirt-im a Jaja, ur zmireɣ.

- Greɣ-am Rebbi a Ṭaṭa, aweɣ ad teččeḍ!

- Ad iketter Rebbi lxir-im a Jaja. Tura hah ay d-swiɣ lqahwa s teɣrifin ɣer Lwiza.

- Ad kem-iḥaseb, i as- terra Nna Jaja.

Kemmlent akken aqeṣṣer armi slant i lwaseε, tekker Yemma Ṭaṭa teṭṭef abrid n tuɣalin s axxam-is. Azekka-nni mi d-tuki, tuɣal armi d Nna Jaja tules-as targit n yiḍ yezrin. Tenna-yas: Suref-iyi a Jaja! Iḍ yezrin urgaɣ amɣar-im ad fell-as yeεfu yerḥem.

- Yak d lxir.

- Urgaɣ-t yewweḍ-iyi-d ɣer uxxam,  yenna-yi-d:

" Wwah a Ṭaṭa!? Tefka-yam-d Jaja lḥut ad yi-t-id-tawiḍ, tugiḍ."

Murad Γazi

Tutlayt-inu