Ismawen isuddimen

Isem asuddim, d isem i d-yettusuddmen seg wawal nniḍen. Amur ameqqran n yismawen isuddimen usan-d seg yimyagen. Ha-ten-aya:

1. Isem n umeskar/n umigaw:

D isem yemmalen wi igan tigawt, yettas-d seg umyag n tigawt, md:

• amekraz si krez (d win ikerrzen)
• anelmad si lmed (d win ilemmden)
• aberraḥ si berreḥ (d xin yettberriḥen)
• axeddam si xdem (d win ixeddmen)

2. Isem n tigawt:

D isem i d-yettusuddumen seg umyag n tigawt, md: 

• učči si ečč
• tira si aru
• aqerdec si qqerdec
• azway si zwi

Tamawt 1:

Tikwal, isem n tigawt yettawi isem akmam  n tɣawsa neɣ agmuḍ i d-tesseggray tigawt, md:

- Učči, d isem n tigawt ma yerza tigawt yeḍran/iḍerrun.

- Učči, d isem akmam n tɣawsa, ma yerza tagella neɣ ayen yettmeččan.

- Tira, d isem n tigawt neɣ  ayen iga win yuran.

- Tira, d isem akmam n tɣawsa neɣ ayen yettwarun.

3. Isem n tɣara:

D isem i d-yettusuddmen seg umyag n tɣara, md:

• tebrek si ibrik
• temses si imsus
• acmat si cmet
• taẓayt si aẓay

4.  Isem n wallal:

D isem n tɣawsa swayes tḍerru tigawt.

• tasalelt si all
• amger si mger
• timceḍt si mceḍ
• tisiqqest si qqes

Tamawt 2:

Γer yismawen-a isuddimen, nezmer ad nernu tasmilt nniḍen. Ta, d iglem neɣ arbib imi yettemcabi aṭas ɣer yisem di talɣiwin: ila sin yemḍanen, snat tewsatin d sin waddaden. Ihi, iglem (arbib), ula d netta, d awal asuddim.  S umata, nessuddum-d igelman deg yimyagen n tɣara, md:

• asemmaḍ si ismiḍ
• unciw si ncew
• ameqqersu si qqers
• azuran si uzur

Akken i llan yigelman (irbiben) ttusuddmen-d seg yimyagen i llan wid i d-yettusuddmen seg yismawen, md:

• alibi si Libya
• akanadi si Kanada
• akudan si akud

* Awalen n yimezdaɣen tmura, zemren ad ttusmersen d irbiben neɣ d ismawen, am:

• akubi: d ayen yerzan Kuba neɣ d amezdaɣ n Kuba.
• anijiryan: d ayen yerzan Nijirya nen d amezdaɣ n Nijirya.

Sadaq Bendali

https://sadbendali.blogspot.com/2020/12/ismawen-isuddimen.html?m=1