Ismawen n umyili (timarewt) II

Aḥric wis II: Inumak n yismawen n timarewt (n umyili):

Timarewt neɣ amyili d assaɣ i yettilin ger yiεeyyalen n yiwet twacult tameẓyant neɣ tameqqrant. D ayen i d-tesseggray tlalit neɣ tisulya deg yiwet twacult neɣ ɣur-s. Assaɣ-a yettili s wudem usrid neɣ d arusrid. S wakka,  nettaf  imdanen i d-yuɣen aẓar di twacult, zdin-ten yidammen yid-s akked wid i d-ikecmen tawacult uɣen-d aẓar si twacult nniḍen war ma zdin-ten yidammen. 

a. Ismawen n yiεeyyalen i zdin yidammen:

• baba: d argaz i yi-d-yesεan.
• jeddi: d argaz i d-yesεan baba neɣ yemma.
• gma: d aqcic i d-yesεa baba d yemma, i d-yesεa baba d tmeṭṭut-is tayeḍ neɣ i d-tesεa yemma d urgaz-is wayeḍ (i tuɣ send baba neɣ deffir-s)
• dadda: d gma-s n baba neɣ zemreɣ daɣen ad t-iniɣ i gma ameqqran fell-i.
• mmi neɣ memmi: d aqcic i d-sεiɣ.
• mmi-s n mmi: d aqcic i d-yesεa mmi.
• mmi-s n yelli: d aqcic i d-tesεa yelli.
• mmi-s n gma: d aqcic i d-yesεa gma.
• ayyaw: d aqcic i d-tesεa uletma maca nezmer ad t-nini i win i d-tesεa twellit-nneɣ.
• mmi-s n uletma: d aqcic i d-tesεa uletma, d ayyaw.
• mmis n yelli: d aqcic i d-tesεa yelli.
• εemmi: d gma-s n baba.
• xali: d gma-s n yemma.
• mmi-s n εemmi: aqcic i d-yesεa εemmi.
• mmi-s n xali: d aqcic i d-yesεa xali.

b. Ismawen n yiεeyyalen i d-yuɣen aẓar di twacult nniḍen:

• argaz: d win tuɣ tmeṭṭut.
• amɣar: d baba-s n urgaz n tmeṭṭut.
• aḍewwal: d argaz yuɣen yelli neɣ d baba-s n tmeṭṭut-iw.
• argaz n εemmti: d argaz yuɣen εemmti.
• tameṭṭut n εemmi: d tameṭṭut yuɣ εemmi.
• argaz n yemma: d argaz i tuɣ yemma send ad tt-yaɣ baba neɣ deffir-s.
• tameṭṭut n baba: tameṭṭut nniḍen n baba maca mačči d yemma.
• alwes: d gma-s n urgaz n tmeṭṭut.
• tanuḍt: d tameṭṭut n gma-s n urgaz n tmeṭṭut.
• aslif: d argaz n uletma-s n tmeṭṭut-iw.
• arbib: d mmi-s tmeṭṭut neɣ mmi-s urgaz si tsulya tamezwarut.
• mmi-s n ulwes: d mmi-s n gma-s n urgaz.
• mmi-s n telwest: d mmi-s n uletma-s n urgaz.
• iken: d gma i d-tesεa yemma yid-i deg yiwen wass.
• takna (1): d uletma i d-tesεa yemma yid-i deg yiwen wass.
• takna (2): d tameṭṭut tis 2 i yuɣ urgaz n tmeṭṭut, ttidirent yid-s deg yiwen wakud.
• mmi-s n takna: d wi i d-tesεa takna.

Tamsirt i d-yessewjed S.Bendali

https://sadbendali.blogspot.com/2021/02/ismawen-n-timarewt-n-umyili.html