Nessen d akken amyag yeftin, yegber sin yiferdisen: amatar udmawan akked ufeggag. Mi ara nekkes amatar udmawan, ayen ara d-yeqqimen d winna ay d afeggag. Md: "nelmed", deg-s ne d amatar udmawan 1u n usget, lmed d afeggag n umyag "lmed" yeftin ɣer yizri.
S wakka, ad negzu dakken yal udem ila amatar-is udmawan, yal timeẓri tla afeggag-is. Γef wayen yerzan afeggag, llan yimyagen ideg yettemcabi ger tmeẓri d tayeḍ. Ma nuɣal ɣer temsirin n umyag alugan d umyag arlugan, ad naf akk tignatin, ttunefkent-d.
Aserwes n yifeggagen ger tmeẓra:
Anaḍ d wurmir, sεan yiwen ufeggag. Md: zwiret/ad tezwirem.
Izri, ila yiwen ufeggag akked wurmir d wanaḍ, mi ara yili umyag d alugan. Md: tmuddeḍ (izri)/mudd (anaḍ)/ad tmuddeḍ (urmir).
Anaḍ ussid d wurmir ussid, sεan daɣen yiwen ufeggag. Md: ttmagaret/tettmagarem.
Afeggag n yizri ibaw ideg tekcem teɣri n tibawt "i", yettemgarad ɣef win n yizri ilaw. Md: nezdeɣ/ur nezdiɣ
Amaɣun, iseεεu afeggag n tmeẓri-s:
Afeggag n umaɣun n yizri d win n yizri. Md: yeggull/yeggullen
Afeggag n umaɣun n wurmir d win n wurmir. Md: ad yeggall/ara yeggallen
Afeggag n umaɣun n wurmir ussid d win n wurmir ussid. Md: yettgalla/yettgallan
Amgired n yifeggagen:
Afeggag n wurmir, yezga yettemgarad d win n wurmir ussid. Md: ad tader/tettader
Afeggag n wanaḍ, yezga yettemgarad d win n wanaḍ ussid. Md: adret/tettadrem
Amgired ger ufeggag d uẓar:
Aẓar n umyag, yegber kan tirgalin tinaṣliyin, ulac deg-s tiɣra neɣ tirgalin i d-yernan ɣer umyag amenzu. Md: Amyag “nelmed”, afeggag-is, d “lmed”, aẓar-is, d “lmd”.
Deg wanaḍ, urmir akked yizri, tirgalin n ufeggag akk, d tid n uẓar. Md: afeg (anaḍ), ad tafgeḍ (urmir), ad yafeg (izri).
Deg wanaḍ ussid d wurmir ussid, llant tergalin i d-irennun d ticraḍ n tmeẓri neɣ n talɣa tasuddimt. Deg umedya, amyag “lmed”, yefka-d ilemmed (urmir ussid), ttwalmed (attwaɣ), sselmed (aswaɣ), myelmad (amyaɣ),
Tamsirt, yessewjed-itt-d S.Bendali
https://sadbendali.blogspot.com/2021/03/asuffe-n-ufeggag-seg-umyag-yeftin.html
Commentaires
Enregistrer un commentaire