Tadiwennit d tmarut Cabḥa Ben Gana

Cabḥa Ben gana, d yiwet tmarut tilemẓit si Ɛin Lḥemmam (Micli), tessuffeɣ-d ungal is amezwaru deg useggas 2019  tsemma-as Amsebrid; terna-d ammud n tmedyazt di 2021 akked gma-s Masinisa, semman-as :  Ixef n wawal.

Tutlayt-inu: Melmi i turiḍ aḍris-im amezwaru n temẓi? (ma tecfiḍ) D acu i d azwel-is?

Cabḥa Ben Gana: Aḍris-inu amenzu uriɣ-t mi lliɣ deg uɣerbaz alemmas gar 2002 d 2004, azwel ines : Ccix-iw-Aselmad-iw (Matoub Lounes).

Tutlayt-inu: Ahat tella kra n tɣawsa i kem-iwellhen ɣer taɣult n tira. D acu-tt?

Cabḥa Ben Gana: Ayen yi-iwellhen ɣer taɣult-agi n tira, d leḥmala-w i tira d tɣuri, i tsekla, daɣen leḥmala-w i tutlayt d yidles inu.

Tutlayt-inu: Anida, melmi tettaruḍ? D acu n uḥric n wass i tesmenyafeḍ i tira?

Cabḥa Ben Gana: Ur sɛiɣ ara akud neɣ adeg i tira, maca sumata ttaruɣ mi ara iliɣ i yiman-iw, ladɣa deg yiḍ ; tira am udfel, tḥemmel tasusmi d tillas.

Tutlayt-inu: Ungal-im amezwaru "Amsebrid", yettawi ameɣri ɣer wammas n tmetti taqbaylit. D acu ay d izen agejdan i yeffren deg-s?

Cabḥa Ben Gana: Aṭas n yiznan i d-mesckukleɣ deg umsebrid, ama ɣef tayri di twacult, gar urgaz d tmeṭṭut. ɣef umennuɣ n tmeṭṭut gar wansayen d tiddin-ines deg wakud yuẓen ar sdat… Amdan akken yebɣu yuzzel, amek yebɣu yidir ɣer taggara, ad yeqqim d amsebrid kan, d inebgi di tudert !

Tutlayt-inu: Aṭas n yinelmaden iqburen n ugezdu n tutlayt d yidles imaziɣen n M.At Mεemmer n Tizi Wezzu, gar-asen, kemm, i uɣalen d imura. D acu ay d ufur n waya?

Cabḥa Ben Gana: Ahat imi i aɣ-iḥuza ujajiḥ n tefsut taberkant. Wa yessaweḍ-d, yecfa-d wa ḥkan-as-d ɣef lbaṭel ibubb ugdud aqbayli. Bɣan ad as-gezmen iles d yiẓuran. Neffud tutlayt nelluẓ idles. Ma d tarmit-inu, afran i tira, d tira s Teqbaylit (Tamaziɣt) yella-d yakan uqbel ad kecmeɣ ɣer tesdawit. Maca aṭas i ibeddel deg-i unekcum-inu ɣer ugezdu n tutlayt d yidles amaziɣ. Din-a i ḍalleɣ ɣef umaḍal n tsekla taqbaylit s tewsatin ines. Aṭas i d-newwi ɣer iselmaden-neɣ am Saɛid Cemax, Ṛemḍan ɛacur, Akli Ṣalḥi d wiyaḍ nniḍen ama  d tamussni  ama d afud … ad faṛseɣ tagnit akken ad ten-snemmreɣ.

Tutlayt-inu: Γur-m, d acu i isehlen, i iweεren, d tira n udlis neɣ d asuffeɣ-nnes?

Cabḥa Ben Gana: Ur tewɛir ara tira n udlis akken yewɛer usuffeɣ ines.

Tutlayt-inu: D acu n umaru n tsuta yezrin i tessarameḍ ad am-yili d azamul, ad taɣeḍ abrid-is ?

Cabḥa Ben Gana: Yal amaru n tsuta yezrin, d azamul ɣur-i, sɛan azal, imi tira nsen ur teqqim ara kan d tsekla, d amennuɣ d tiɣri, d asekfel d usefti n tgemmi-nneɣ… 

Tutlayt-inu: Iwumi tettaruḍ? I uɣref-im neɣ i talsa s umata? D acu ara tiniḍ ma teɣli-am-d tegnit n usuqel n wungal-im?

Cabḥa Ben Gana: Tira-w, tikwal  d azuzen d usugen, tikwal d izen, tikwal i tutlayt tikwal, i talsa. Ma d tasuqilt ur d-qqareɣ ara ala!

Tutlayt-inu: Di tmuɣli-m, amdan amaziɣ neɣ aqbayli, d win yeqqaren neɣ yesra i usḥulfu ugar ɣef tɣuri?

Cabḥa Ben Gana: Llan wid yeqqaren, mazal ḥemmlen ad kecmen deg umaḍal n yidlisen, maca les réseaux  sociaux yejbed cwiṭ ilmeẓyen ɣef udlis, mačči ala iqbayliyen, tamsalt-a tḥuza leǧnas merra.

Tutlayt-inu: Tutlayt tamaziɣt, mazal-itt ur tufi iman-is ar tura. D acu i tt-ixussen akken ad teffeɣ seg yir addad ideg tella?

Cabḥa Ben Gana: Ddac ddac akken ad naweḍ, ur ntettu ara belli si mi nebda abrid, si 81 i tebda tutlayt-a tesrusuy iman-is ɣef tferkit. Lexṣas yella, yewwi-d uxeddim ad yili, yal wa ad yernu asɣar-is, akken ad temmed taffa. Tutlayt-a teḥwaǧ arraw-is ; wid ara tt-yarun, ara tt-yeɣren, ara tt-yemmeslayen, teḥwaǧ imura, imesnilsen, imazrayen… atg

Tutlayt-inu: D acu tessarameḍ deg waya?

Cabḥa Ben Gana: Sarameɣ tadukli gar yiqbayliyen, gar yimaziɣen ilmend n Teqbaylit d  Tmaziɣt !

Tutlayt-inu: Efk-d tamuɣli-m ɣef "tutlayt-inu" fell-as d yigburen-is.

Cabḥa Ben Gana: Afud igerrzen di leqdic nwen.

Tutlayt-inu: Awal n taggara, a-t-an ɣur-m.

Cabḥa Ben Gana: Tanemmirt i kunwi i yesseqraben imura ɣer yimeɣriyen.

Tadiwennit, yexdem-as-tt Sadaq Bendali

https://sadbendali.blogspot.com/2021/04/tadwennit-d-tmarut-cabha-ben-gana.html