Ḥekkun-d ɣef yiwet n teqcict tecbeḥ mačči d kra. Asmi d-tewweḍ i zzwaǧ, yuɣ-itt yiwen n yilemẓi d igellil ; d aẓawali, ur yesεi ara acu ara yečč.
Yiwen wass, yekker-d urgaz-a, yenna-as i tmeṭṭut-is : ad ruḥeɣ, ad inigeɣ ad nadiɣ axeddim, ad d-ḥerreɣ idrimen ad am-kkseɣ lḥif ɣef uqerru-im. Ma yella ur d-uɣaleɣ ara akka 20 n yiseggasen, ḥseb iman-im tennebraḍ, tekkreḍ ad tεiwdeḍ ddunit-im.
Azekka-nni, yeṭṭef urgaz-nni abrid, ileḥḥu yettnadi armi d-yufa amahil di tmurt i ibeεden mliḥ. Yal ass d amahil, ijemmeε deg yidrimen irennu...
Uqbel ad yessiweḍ 20 n yiseggasen ɣer rrwaḥ-is, yessuter deg umεellem-is, ad yuɣal ɣer uxxam-is, tameṭṭut-is d mmi-s i yeǧǧa-n di tεebbuḍt n yemma-s. Amεellem yeqbel yerna imudd-as-d kraḍet twiztin, yenna-as, ahat ad tent-tiḥwiǧeḍ deg ubrid-ik.
Akken d-yebda urgaz-nni abrid, yemmuger-d sin n yilmeẓyen d yiwen umɣar, ikemmel amecwar yid-sen. S kra yella ubrid, amɣar ur d-yenni kra, argaz yewhem kan deg-s, yesteqsa ilmeẓyen, nnan-as : ma tebɣiḍ ad tesleḍ i yiwet tefyirt s ɣur-s, mudd-as tawizet.
Yeqqim urgaz d yiman-is, yenna-as ahat awal-is d lfayda, ad as-fkeɣ akk tiwiztin-a. Akken i as-tent-yefka, yenṭeq-d :
- Tamezwarut, ḥader asif.
- Tis snat, mi twalaḍ igudar deg yigenni, ruḥ muqel acu yeḍran.
- Tis kraḍet, uqbel ad txedmeḍ kra, ḥseb armi d 25 .
Ikemmel urgaz-nni abrid, yelḥa, yelḥa armi yewweḍ ɣer wasif, din din yemmekta-d awal n umɣar-nni.
Yeqqim, yesteεfa, yusa-d yiwen ɣef uεawdiw, iruḥ ad yezger asif, ihewwel yewwi-t. Ma d aserdun yemneε, yewhem deg wawal n umɣar, yerkeb-it ikemmel tikli.
Iteddu, ileḥḥu iwala igudar, iqerreb s adeg-nni yufa kraḍ yemdanen fesren di tmurt, tama-nsen asenduq yeččur d ureɣ. Yerfed-d asenduq, yuɣ abrid n taddart-is armi yewweḍ s axxam-is.
Akken yekcem deg umnar n tewwurt, yesla i tmeṭṭut-is thedder d yiwen . Yejbed-d amrig-is, yemmekta-d awal n umɣar, yebda iḥetteb : 1, 2, 3, 4, 5... armi yesla i yilemẓi, yeqqar-as i yemma-s ; ɣef wakken d-tenniḍ assa ara d-yuɣal baba.
Yebra i umrig-is, yeẓdem s axxam s ucmumeḥ d teḍsa. Seg wass-nni ur tuɣal twacult ad temfaraq, temlal tasa d way turew.
Musus Yasmin, tanelmadt deg useggas wis 3,
deg uɣerbaz alemmas Unar, Mεatqa
https://sadbendali.blogspot.com/2021/04/tamacahut-n-teqcict-tucbiht-d-yilemzi.html
Commentaires
Enregistrer un commentaire