Tadiwennit d umaru Akli Ǧebra, asnulfay n yinzan

Akli Ǧebra, d mmi-s n taddart Tanεast seg Wayt Jennad, di Tmurt n Leqbayel.
Yettaru s Tmaziɣt Taqbaylit, tizlatin, isefra,  akken daɣen i yettaru s Tefransist.
Send ad yeffeɣ ɣer testaɣt, yella ixeddem d amsiḍan n twuri (comptable de profession). Ar tura, irennu ixeddem, ur yeqqim ara kan. Daɣen, yettmuddu azal i tiran yidlisen. Tutlayt-inu, tga tadiwennit yid-s, ha-tta-aya:

Tutlayt-inu: Acu i k-yewwin ɣer ubrid-a n tira?

Akli Ǧebra: Sεiɣ deg wul-iw lḥir d lebɣi akken ad snerniɣ ciṭ deg umecwar n umennuɣ ɣef Tmaziɣt. Ahat itett-iyi wul-iw ɣef yedles-nneɣ.
Tutlayt-inu: Acḥal n yidlisen i d-tessuffɣeḍ?
Akli Ǧebra: Uriɣ sin; yiwen, "inzan s lmizan", yeffeɣ-d ɣer teẓrigt "identité", yelḥa mliḥ . Wis  sin, "inzan si tudert yefsan",  iteddu s ttawil.
Tutlayt-inu: Anida zemren yimeɣriyen ad afen idlisen-ik?
Akli Ǧebra: Di temkarḍiwin n tmurt n Leqbayel,  ad steqsin kan.
Tutlayt-inu: Inzan, i d-tewwiḍ deg yedlisen-inek, d kečč i ten-id-yesnulfan. Amek i ak-d-tusa tikti? 
Akli Ǧebra: Isental ɣef i ttaruɣ,  jemmleɣ-d akk wid yelhan n ddunnit, tayri, tagmat, atg.
Tutlayt-inu: Acu n yisental  iɣef d-tettawiḍ inzan?

Akli Ǧebra: Yal asentel yellan di tudert-nneɣ, ḥemmleɣ ad zriɣ fell-as inzan. Ttextiriɣ isental yeṭṭuqten di tmettl : tayri, lḥif…
Tutlayt-inu: Yella wacu tettheyyiḍ Ɣer zdat.
Akli Ǧebra: Aql-i, ssewjadeɣ adlis-inu wid kraḍ, qrib ad ifakk.
Tutlayt-inu: Idlisen-ik, d ayen qqaren yimeɣriyen ?
Akli Ǧebra: Tidet kan,   idlisen-inu, d wid qqaren, greɣ tamawt anida serseɣ adlis, ad t-aɣen yimeɣriyen.
Tutlayt-inu: Temlaleḍ-d uguren deg ubrid n tira?
Akli Ǧebra: Ugur-iw, d ugur n yimura akk, adlis amenzu d win i iyi- yesserwan lḥif, ma d adlis wis sin, ciṭ kan n wuguren. Ilaq imeɣriyen ad ẓren belli d amaru i yettxellisen amaẓrag (l'éditeur) akken ad as-d-yessuffeɣ adlis-is.
Tutlayt-inu: Acu i k-yewwin ɣer tira n yinzan, mačči ɣer tewsatin-nniḍen?
Akli Ǧebra: Zik ttaruɣ tizlatin, isefra daxel-iw ur ttwaqennεeɣ ara s wannect-a. Asmi zziɣ ɣer yinzan ufiɣ iman-iw mliḥ mliḥ.
Tutlayt-inu: Acu ara tinid i wid i iqeddcen ɣef yedles (ablug  tutlayt-inu) ?
Akli Ǧebra: Ad iniɣ i wid yettarun, yelha mliḥ ticki ara naru s tutlayt-nneɣ, maca yewwi-d fell-aɣ ad naru ayen ara irefden timetti, ayen s wacu ara nenfeε idles d tutlayt-nneɣ. Ma d ablug tutlayt-inu ad awen-iniɣ tanemmirt imi iyi-tefkam azal, terram-d ɣur-i. Tanemmirt ɣef wayen i txeddmem akken ad tesnernim idles-nneɣ.
Tutlayt-inu: Asirem-inek?

Akli Ǧebra: Ssarameɣ tutlayt-nneɣ ad tecbu tutlayin-nniḍen, ad teṭṭef amkan-is, ad tesεu azal di tmurt-is d tamezwarut, syin di tmura n umaḍal merra.
Tutlayt-inu: Awal-ik n taggara?
Akli Ǧebra: Awal-iw aneggaru, ssarameɣ ad uɣalen yimeɣriyen am zik, ad fken azal i udlis. Di taggara, ad snemmreɣ aṭas ablug tutlayt-inu d massa i iyi-ixedmen tadiwennit-agi.
Tadiwennit, texdem-itt Farida Cebbiri
Tutlayt-inu

https://sadbendali.blogspot.com/2021/05/tadiwennit-d-umaru-akli-gebra-asnulfay.html