Aseddi n Baba Ɛli, tanfust n umures

Ku tikkelt g tuweḍ tizi n uɣujjer (lefḍur) g remḍan-a izrin, da itteqqel yan wuṭṭun ameqqran n imerrukiyen s useddi-nsen amenyaf Baba Ɛli. 

Ameggaru-a issidet yan umures war anaw g umezruy n udrama amselmaziɣ s wuṭṭun ameqqran n ineḍfaren ya g ttilifizyun tamaziɣt (tv8) ya g tbadut n Warda Vusion g Youtube. 

G yan wusun amsedrar g llan imuɣliten (paysages) ɣudanin kigan, g tella kigan n tizzegzewt d waman, ibedda umessufeɣ M. Acawer ɣef useddi n Baba Ɛli nna mi isker A. Ntama asinaryu yurar dig-s tilalt tadeslant. Aseddi-a isman yat trabbut n isegbaren sugernin n ssinima tamaziɣt n temnaḍt n iffus ayenna t-yujjan ad yili yan watig imeqquren ifek-as addur dar ugdud. 

Aseddi-a, issenked tanfust ittwassnen kigan n Ɛli Baba g yan walbuḍ akumidi amaziɣ s tɣarast n isura nna tessufeɣ Bubekdi zun d «Ḥdiddan » d «Ṛemmana u Berṭal ». Seg mayd bdant txersin-nnes timezwura, isker useddi-a yan umsegdal (débat) axatar, ayenna yujjan kigan n tbadutin n usneɣmes ad ɣif-s siwlent allig fell-as tsawel awed tbadut n utilifizyun Al-Ḥurra.

Kigan n medden nna ur iẓḍaren ad ḍefren aseddi g utilifizyun, ḍefren-t g Youtube g tbadut n Warda Vision, ar ittaweḍ wuṭṭun n imannayen g tbadut-a attayen n uzgen n umelyun i wass, teg texrest tameggarut tamezwarut g Tendance n Umerruk g Youtube ayenna igan anẓa ameqqran n wis imures kigan. 

Tawuri-a, tga tayafut n kigan n isegg°asen n uswuri g yiger n ssinima isawalen s Tmaziɣt g tmazirt n Sus nna ibdan g 1991 akked umessufeɣ Aḥmed Badduj s usaru-nnes «tamɣart n wureɣ» nna d-tessufeɣ Warda Vision. Tameggarut-a tessufeɣ-d wahli n isura-yaḍen s Tmaziɣt nna ttwassennin g Umerruk s timmad-nnes zun d «Bu tfunast», «Mukir »,  «Ḥemmu Unamir »,  «Ran kullu ddunit», «Tiyti n wuḍan», «Ɣassa ddunit azekka lixert »...atg.

Isura-a, d wiyaḍ ẓḍaren ad sersen tasila i ssinima tamaziɣt g temnaḍt n unẓul n Umerruk teɣnu-d yan mennaw n yitran am igellin n «Ḥmad Badduj»,  «Muḥemmad Abaɛemran »,  «lburka Lḥusayen»,  « Mbardk Elɛeṭṭac »,  «Burdwaz »,  «Ɛaṭif »,  « F. Bucan»,... atg.

Isul udrama amaziɣ da ittnala kigan n imukrisen nna ur t-ittajjan ad ibuɣlu ugar, nẓuẓeḍ ad fsin g yimal nili yat ssinima d ddrama tamaziɣt ibuɣlan ittakkan yan tewlaft iẓilen ɣef ufgan amaziɣ tawes g ufrag i tutlayt tamaziɣt d ubuɣlu-nnes.

Muḥemmed Belarhzali

I tutlayt-inu

https://sadbendali.blogspot.com/2021/05/tanfust-n-umures-baba-li.html