Awsil n tenzeɣt wis 3, d "s" neɣ "as"?!

 

Awsil n tenzeɣt wis 3 n wasuf neɣ n usget amalay neɣ unti:

1.yettili d "s, s, sen, sent" mi ara yeqqen ɣer tenzaɣ: deg, seg, sdat, deffir, nnig, ɣur(ɣer). 

Imedyaten:

- deg-s, deg-s, deg-sen, deg-sent.

- seg-s, seg-s, seg-sen, seg-sent.

- sdat-s, sdat-s, sdat-sen, sdat-sent.

- deffir-s, deffir-s, deffir-sen, deffir-sent.

- nnig-s, nnig-s, nnig-sen, nnig-sent.

- ɣur-s, ɣur-s, ɣur-sen, ɣur-sent.

- ɣer-s, ɣer-s, ɣer-sen, ɣer-sent.

2. Yettili d "as, as, asen, asent" mi ara yeqqen ɣer tenzaɣ: ddaw. fell (si ɣef), gar (si ger).

Imedyaten:

- fell-as, fell-as, fell-asen, fell-asent.

- gar-as, gar-as, gar-asen, gar-asent.

- ddaw-as, ddaw-as, ddaw-atsen, ddaw-atsent.

*Deg usget, tkeccem-d tergalt "t".

Awsil n tenzeɣt "s":

Awsil wis 3, mi ara yili yeqqen ɣer tenzeɣt "s n wallal", yettili cwiṭ n wugur deg ususru akked tira. Ayɣer? Acku tanzeɣt "s", tettbeddil talɣa-s mi ara tt-yeḍfer uwsil, Tettuɣal d "yis". 

Imedyaten:

- Yegzem s uqabac. --> Yegzem yis-s.

- Yegzem s tqabact. --> Yegzem yis-s.

- Yegzem s yiqubac. --> Yegzem yis-sen.

- Yegzem s tqubac. --> Yegzem yis-sent.

Xas deg ususru, nettɣilli yiwen n "s" i yettilin maca llan sin: yiwen n tenzeɣt (s yuɣal d yis), wayeḍ d "s" i yezgan iteddu d uwsil wis 3. 

Tagnit-a, nettaf-itt di tenzeɣt "d" i yettuɣalen "yid". Ad nẓer aserwes-a:

- Yeqdec yid-s <-> Yeqdec yis-s.

- Yeqdec yid-s <-> Yeqdec yis-s.

- Yeqdec yid-sen <-> Yeqdec yis-sen.

- Yeqdec yid-sent <-> Yeqdec yid-sent.

Tamsirt sɣur Sadeq Bendali

https://sadbendali.blogspot.com/2021/10/awsil-n-tenzet-wis-3-d-s-ne-as.html