Argaz ur neskerkis (ur neskiddib)

Tasuqilt n Ɛumar Mufuq

Yella, yiwet n tikkelt, yiwen n urgaz yessnen ṣṣwab, isem-nnes Mamad.  Argaz-a werǧin yeskerkes. Ayt tmurt-nnes akk ssnen-t, ula d wid izedɣen deg tuddar wuɣur ara teddud 20 n wussan akken ad tawḍed ɣer-sent.

Asmi ay yesla yes-s ugellid, yumeṛ ad as-t-id-awin. Mi t-yemmuqqel, yetter-it: 

"D tidet, a Mamad, kečč werǧin teskerksed?"

- "D tidet." 

-Yernu werǧin ad tsekrrkseḍ deg tmeddurt-nnek?

- Ta ḍemneɣ-ak-tt."

- Aha. Ihi ssawal kan tidet, maca ḥader! Kra n wass, tzemred ad d-teccḍeḍ deg wawal, ad tafeḍ iman-nnek tsekrekseḍ." 

Kkan acḥal n wussan deffir waya, yules yeɣra-d ugellid i Mamad. Yella lɣaci d ameqqran mi yella yettḥellis ugellid iman-nnes akken ad yeddu ad iṣeyyed. Yeṭṭef ugellid ayis (aεudiw) seg ssbayes, yessuli aḍar-nnes azelmaḍ ɣer rrkaba, dɣa yenna-as i Mamad:

- Ddu ɣer leqṣer-inu n unebdu tinid-as i tgellidt ad d-qqleɣ uqbel imekli yernu yid-s ara t-ččeɣ. Ini-as ad d-tsewjed zzerda d tameqqrant. Ula d kečč tettwaεerḍeḍ.

Mamad yunez-as i ugellid, yeṭṭef abrid ɣer wanda ay tella tgellidt. Ma d agellid, yeṭṭerḍeq d taḍṣa, yenna-d:

- Nekkni, macci ɣer ṣṣyada ara neddu yernu ayen ara as-yini Mamad i tgellidt d tikerkas. Azekka ad neḍṣ fell-as."

Maca Mamad, yellan d amasnag (sage) yedda ɣer leqṣer, yenna-as i tgellidt:

- yezmer lḥal ass-a ara teswejded zzerda niɣ azekka acku yezmer lḥal agellid ad d-yeqqel seg ṣṣyada uqbel imekli am wakken yezmer daɣ lḥal azekka ara d-yeqqel.

Tenna-as tgellidt: "Maca melmi ara d-yeqqel?"

- Walaɣ-t yessers aḍar-nnes azelmaḍ ɣef rrkaba, maca ur t-walaɣ ara yerfed-d aḍar-nnes ayeffus seg lqaεa."

Swejden-d zzerda-nni ass-nni, sakkin qqimen ttṛajun agellid melmi ara d-iḍill, maca armi d azekka-nni ay d-yusa. 

Mi d-yewweḍ, yezmumeg, yenna-d:

- Mamad-nni amasnag, ɣas yeqqar werǧin yeskerkis, yeskerkes fell-awen iḍelli.' 

Maca tagellidt, tules-as-d i ugellid ayen ay as-yenna Mamad, awal, awal. Imir-nni, agellid, ifaq dakken Mamad d tidet ur yeskerkis ara yernu ala ayen teẓra tiṭ-nnes ay d-iḥekku.

Sɣur Omar Mouffok (d asezgi n yiwet n tengalt tafriqit)

https://sadbendali.blogspot.com/2021/11/argaz-ur-neskerkis-ur-neskiddib.html