Aɣlad-nneɣ ur yelli d amadaɣ, ur telli deg-s tsusmi. Wissen kan maɣef ay as-semman akka. Aɣlad-nneɣ ɣas wezzil, 22 (simraw sin) n yigerdan ay izedɣen deg-s. 22, ih!
Aɣlad aydeg ara zedɣen 22 n yigerdan ay d-itteffɣen akken ma llan ad uraren s yilellac, tacirin, iḍan d yimcac-nsen d aɣlad yezgan izehher. Ɣef waya, llan wid ay as-yettinin « Amadaɣ n Tzizwa ».
Mi iɛedda kan wass n yiɣef n useggas, ffɣen-d akk yigerdan n uɣlad ad uraren deg udfel. Ula d Polly tamecṭuḥt, yelli-s n uxxam n Carter, ssuffɣen-tt-id deg tmeccayt-nnes. Adfel yella yekkat, nettat tella tessenday tiqeffazin-nnes akken ad d-teṭṭef imeččimen n udfel.
Gma-s, Timmy, yeqqim yettkexkix d taḍṣa, yettmuqqul-itt. « Ur tessined ara amek ara d-teṭṭfed imeččimen n udfel, a Polly! » ay as-yenna. « Maca nekk ssneɣ! Mmuqqel! »
Timmy yebda yettɛassa imeččimen n udfel mi d-ɣellin, mi iwala yiwen iqerreb-d, ad iwet gar yifassen-nnes yedlen s yiqeffazen akken ad t-id-yeṭṭef. Mi yedla ɣer gar yifassen-nnes, ad yaf ulac ameččim-nni.
Mi iwala akken, yenna-d: « Ziɣ ula d nekk ur ssineɣ ara ad ten-id-ṭṭfeɣ », dɣa yerfed iɣef-nnes deg yigenni, yebda yettaḍsa.
Sakkin, yemdel imi-nnes, yeqqim ittezzi iles-nnes deg imi, dɣa yenna-d: « Maca ssawḍeɣ ad d-ṭṭfeɣ kra seg-sen s yimi-inu yernu d isemmaḍen! »
Sɣur Omar MOUFFOK (D asezgi n « What-a-Jolly Street » n Nan Gilbert)
I tutlayt-inu
https://sadbendali.blogspot.com/2022/04/alad-n-umada-yemsusamen.html
Awnivark rebbi
RépondreSupprimerThanks
RépondreSupprimer