Tadiwennit akked umaru-amedyaz Salem Maḥuc

Salem Maḥuc, d yiwen umedyaz,  amaru, si taddart n Cebbu, di Ǧεifra, deg ugezdu n Burǧ Buεririǧ. Segmi yella d ameẓyan i as-tekcem tmaziɣt ul-is. Annect-a, yeǧǧa-t yettaru s tutlayt n uɣref-is si temẓi-s. Tutlayt-inu, tuẓa ɣur-s, testeqsa-t ɣef leqdic-is d tmeddurt-is taseklant. Ad tafem tiririyin-is di tdiwennit-a:

Tutlayt-inu : Melmi tebdiḍ amecwar-ik n tẓuri ?

Salem Maḥuc: Asmi meẓẓiyeɣ, ad iliɣ 15 neɣ 16 n yiseggasen, ttariɣ ttarraɣ di ṭṭerf.  

Tutlayt-inu : Acḥal n yedlisen i turiḍ, bder-aɣ-ten-id ?

Salem Maḥuc: Idlisen i uriɣ d wigi :

• Tamedyazt war tansa 2005.

• Taftilt 2006.

• Tiṭ ɣer zdat, tayeḍ ɣet deffir 2006.

• Aẓar n tnekkit 2007.

• Taddart n Cebbu 2017.

• Iṭij n yileɣban 2017.

• Aɣerrabu n usirem 2020.

  

Tutlayt-inu : Amek tebdiḍ amecwar n tira ?

Salem Maḥuc: Asmi bdiɣ, ttaruɣ srusuɣ-ten.Tusa-iyi-d tikti ad d-jemεeɣ ayen uriɣ;  llan wid i iyi-d-yernan afud, suffɣeɣ-d ammud n tmedyazt d taḥawact n temẓi, ur bɣiɣ ara ad ruḥen, ilaq ad ten-id-afent tsutwin i d-iteddun.

Tutlayt-inu : Anida tettafeḍ iman-ik aṭas di tmedyezt neɣ di tesrit ?

Salem Maḥuc: Ayen i iyi-d-yeldin allen d tamedyezt, tura tamuɣli-w truḥ ɣer tira n tullisin d wungalen. Maca tidet kan, ur zmireɣ ara ad semgirdeɣ gar-asen.

Tutlayt-inu : Acu-ten yisental iɣef tettaruḍ ?

Salem Maḥuc: Mačči d nekk i yettawin,  d tignatin i ten-id-yeslalayen. Ma yefreḥ yiwen, ad d-yas usefru n lferḥ, ma yeḥzen d asefru n lqerḥ ara d-yasen. Isental akk yellan di tudert, nedder-iten neɣ nettidir-iten ; lḥif n ddunit, tayri d yiḥulfan, tutlayt d yedles, ansayen d tmagit…ur tezmired ara ad textired, d azrireg  i d-ttezririgen deg wallaɣ. Ma d ungal yemgarad ; ad tḥulfuḍ s tikti neɣ s tedyant,  ad taruḍ fell-as.

 Tutlayt-inu : Amek tettwaliḍ idles gar zik d tura ?

Salem Maḥuc: Idles yuẓa ɣer zdat, mazal-it yettaẓ. Mi ara twaliḍ ilmeẓyen ass-a, ttarun, ssuffuɣen-d, d ayen yessefraḥen aṭas. Ma yelha neɣ ixuss d imeɣriyen ara iḥekmen.

Tutlayt-inu : Idlisen-ik, anwa i ten-yeqqaren s waṭas ?

Salem Maḥuc: Ur ẓriɣ ara !  Maca imeɣriyen tura xussen, ur qqaren ara adlis. Nessaram kan ad tbeddel teswiεt, ad rren ddehn-nsen ɣer tɣuri d udlis.

Tutlayt-inu : Ahat, yella kra n usenfar i tettheyyiḍ ɣer zdat ?

Salem Maḥuc: Sεiɣ yiwen n udlis, muddeɣ-t i teẓrigt, semmaɣ-as "Imnufaq". D ammud n tullisin, yettmeslay-d ɣef tudert n tmeṭṭut. Gar tullisin-a, yiwet tezdeɣ deg udrar di tallit-nni n ṭṭrad wis sin. Tayeḍ ɣef temɣart tazemnit d wazal-is di tmetti… Ssewjadeɣ  daɣen, yiwen n uḍebsi d tamacahut i warrac.

Tutlayt-inu : Tiɣri-inek i yimura ?

Salem Maḥuc: Tiɣri-inu i yimura, ur fecclen ara, ad arun, ad d-suffɣen xas akken imeɣriyen xussen. Ma nzan yedlisen-nsen yelha, ma ur nzin ara, ad d-yas wass ad d-banen, am win ijemεen nneεma deg ukufi.

Tutlayt-inu : Acu i tessarameḍ ?

Salem Maḥuc: Ssarameɣ tasekla-nneɣ ad taɣ yal adeg, ad teddukel.

Tutlayt-inu : Awal-ik i wid i iqeddcen ɣef yedles d ublug tutlayt-inu.

Salem Maḥuc: Ad snemmreɣ aṭas Mass Bendali ɣef leqdic-agi amerkanti i ixeddem, ad as-nini afud igerrzen.

Tutlayt-inu : Awal n taggara, a-t-an ɣur-k.

Salem Maḥuc: Tanemmirt ɣef tdiwennit-agi i iyi-tgam, d wazal iyi-tmuddem.

Tadiwennit, tessewjed-itt-id Farida Cebbiri.

https://sadbendali.blogspot.com/2022/04/tadiwennit-akked-umaru-amedyaz-salem.html