Ḥemza Zabuṭ d amdan am wiyad, d anaẓur, d win i ixeddmen taklut. D mmi-s n Larebεa n At Yiraten, taddart Tablabalt i yettwassnen s udfel d usemmid aqesḥan di tegrest, deg unebdu yelha lḥal, rewwun yimezdaɣ-is abeḥri. Ha-tt-a tdiwennit i as-nga:
Tutlayt-inu : Amek i d-tufiḍ iman-ik txeddmeḍ taklut ?
Di tazwara yella wanida d-yettlal umdan, yettawi-d yid-s tikci-a, ur as-yettfiqi ara bab-is. Yella wanida i tt-ilemmed. Ḥemza yekker-d akka i tt-id-yufa, segmi qqareɣ deg uɣerbaz amenzu i ḥemmleɣ taklut d tẓuri s umata.
Tutlayt-inu : Ahat yella wacu i k-ijebden akken ad tkecmeḍ deg unnar-a n teklut ?
Yal taɣawsa tesεa taεwint ansi d-tettfeggiḍ ; cfiɣ asmi meẓẓiyeɣ, tewwi-d uletma kra n yisunɣen i as-d-imudd uselmad-is, εeǧben-iyi mliḥ, amek qeεden d wamek weznen. Seg yimir-nni, rriɣ ddehn-iw ugar ɣer teklut…
Tutlayt-inu : Acu tḥemmleḍ ad tsunɣeḍ s waṭas ?
Ḥemmleɣ ad sunɣeɣ kullec, zemreɣ ad d-iniɣ seg ublaḍ armi d ayen meqqren, awi-d kan ad d-suffɣeɣ iḥulfan-iw. Anaẓur yettbeggin-d iḥulfan-is deg wayen yettwali neɣ ayen ara yeṭṭef .
Ḥemmleɣ ad xedmeɣ s yal taɣawsa; aɣanib, imru d ssbiɣa.
Tutlayt-inu : Melmi txeddmeḍ taklut, d kečč i yettruḥun ɣur-s neɣ tettas-d weḥd-s ?
Tikwal d tarewla i rewwleɣ ɣur-s, imi ttafeɣ-tt d ddwa i yiɣilifen-iw. Tikwal-nniḍen, mi ara yili ferḥeɣ ḥemmleɣ ad sunɣeɣ. Ttruḥuɣ si tudert ɣer tudert yeččuren d asugen d tlelli.
Tutlayt-inu : Acu-ten yisental i nezmer ad d-nefhem si tfelwiyin-inek ?
Aṭas n yiɣaniben i ssemraseɣ ; am trudemt d umadwan … ma d isental, tafelwit am tezlit, tettales-d tadyant, asirem, layas... Taklut d ilel, anaẓur yettawi-d akk isental i icudden ɣer tudert-nneɣ… rnu xas nekk fkiɣ-asent isem i tfelwiyin-iw, amdan-nniḍen yezmer ad asent-yefk anamek wayeḍ, abeεda tigi n umadwan (abstrait). Ma d tifelwiyin n yemdanen neɣ n twennaḍt, acemma ur t-sεint, d tajmilt kan i xeddmeɣ.
Tutlayt-inu : Ḥemza Zabuṭ ixeddem taklut, akken daɣen i icennu. Tewwiḍ yakan arraz amezwaru n temsiizzelt n Meεtub Lwennas. Amek i d-tufid iman-ik tcennuḍ ?
Tidet kan armi d iseggasen-agi ineggura i kecmeɣ ccna, ḥemmleɣ ad cnuɣ ayen i yi-qerḥen d wayen ẓiden…. Ḥemmleɣ ad sleɣ i Lunis, Crif Ḥamani d wiyaḍ. Maca Meεtub d ayen nniḍen, yis-s i d-nekker, yettrebbi, yettak-aɣ-d tabɣest d usirem.
D lḥif-iw i iyi-rennun afud, ttgeɣ tabɣest i yilan-iw. D uguren i yi-d-yessenṭaqen, i iyi-ttaken tabɣest akken ad dduɣ ɣer 8zdat. Llan wid i yi- yettεawanen, maca qlilit.
Tutlayt-inu : Yella kra tettheyyiḍ n yisenfaren ɣer zdat, ama di teklut neɣ di ccna ?
Di teklut aql-aɣ nessunuɣ dima, win i aɣ-d-yessawlen ad nruḥ am temzikent. Akken daɣen i aɣ-d-ssawalen ɣer yiɣerbazen akken ad neg tifelwiyin d wayen-nniḍen, nezmer ad d-nini yuɣal d axeddim n yal ass. Ma d tizlatin, heggaɣ azal n 10, mazal kan ad tent-skelseɣ, d ttawilat i aɣ-tent-yekksen.
Xedmeɣ yiwet n tezlit di yutub semmaɣ-as tadyant-ik .
Tutlayt-inu : Acu tessarameḍ ?
Asirem-iw yewεer ; bɣiɣ kan lehna, talwit.
Tutlayt-inu : Tadukli, acu ara tiniḍ fell-as ?
Tadukli tettili ticki yella lehna, ma ulac lehna ulamek ara tili tdukli.
Tutlayt-inu : Awal-ik ɣef umkan n unaẓur di tmetti ?
Yella usawen, yella ukessar, anaẓur ur yufi ara iman-is di tmurt di ddeqs n temsal. Yewεer ticki ara tεetbeḍ ur tettɣelliteḍ, nessaram kan ad tbeddel teswiεt ɣer wayen yelhan.
D ayen igerrzen mliḥ, maca d lwaǧeb kan i xeddmen, d amennuɣ ur wwin cciεa wala ccan. Ilaq win ixeddmen s wul ad yesber, leqrar-is ad yali wass.
Tutlayt-inu : Acu ara tiniḍ i ublug tutlayt-inu ?
Ssarameɣ-awen afud ameqqran, aql-aɣ akk deg yiwen n lbabur, yal yiwen ad yexdem amur-is. Win iḥemmlen idles, yewwi-d fell-as ad yesber i kullec, tlaq-aɣ daɣen tdukli, ma neddukel idurar ad rmimzen.
Tadiwennit, texdem-itt Farida Cebbiri
https://sadbendali.blogspot.com/2022/04/tadiwennit-akked-unazur-hemza-zabut.html
Commentaires
Enregistrer un commentaire