Tadiwennit akked umaru Fahim Mesεuden

Tutlayt-inu: Ttxil-k, ssenked-d iman-ik i yiseqdacen n "tutlayt-inu".

Fahim Mesεuden: Nekk d win iḥemmlen tasekla, qeddceɣ akken ssneɣ, s wayen iwumi zemreɣ.
Tutlayt-inu: Melmi tebdiḍ tira? 

Fahim Mesεuden: Seg wasmi lliɣ d amecṭuḥ ḥemmleɣ ad aruɣ. Seg wass-n ar ass-a ttnadiɣ, snernayeɣ deg uswir-inu akken ad aẓeɣ ɣer sdat, akken ad d-awiɣ tiktiwin timaynutin i tsekla-nneɣ. 

Tutlayt-inu: Mmeslay-aɣ-d ɣef udlis-ik amezwaru. Acu d asentel-is?

Fahim Mesεuden: Adlis-iw amezwaru d ammud n yisefra iwumi fkiɣ azwel « Tiyersi », yeffeɣ-d deg useggas n 2013. Isental yellan deg-s ugten : ddunit, tudert n yilmeẓyen, tayri, agama, tayemmat, tameṭṭut, laṣel, tapidagujit. 

Tutlayt-inu: D acu i ak-yettmuddun tahregt i tira?

Fahim Mesεuden: D timetti deg ttidireɣ, d tilufa n yal ass, d tidyanin iḍerrun di ddunit d wayen akken ddreɣ nekk, akked wayen ttwaliɣ iḍerru gar wallen-iw. 

Tutlayt-inu: Ini-aɣ-d azal i tla tira ɣur-k (di tudert-ik).

Fahim Mesεuden: Tira ɣur-i, d azuzen, d tukksa n lxiq, d asenɣel n ikuffiren d wurfan yellan deg wul. D aqlab n yisebtar i kra n tedyanin ddreɣ, ama d tid yessefraḥen ama d tid yesseqraḥen. 

Tutlayt-inu: Kečč, d win yeɣran ayen yerzan tatiknulujit di tesdawit; ssegzi-aɣ-d amek armi yejbed wul-ik ɣer Tmaziɣt: tlemdeḍ-tt, tuɣaleḍ d amaru yis-s?

Fahim Mesεuden: Aya akk, yebda-d asmi lliɣ d ilemẓi, lliɣ deg umussu adelsan n taddart-nneɣ. Ilmeẓyen iqedcen imiren-nni mlan-aɣ abrid n umennuɣ deg ubrid n laṣel. Imiren gziɣ tikti n umennuɣ ɣef tutlayt-nneɣ. Ẓẓan deg-i tazarreɛt n usmeɣnes, temɣi deg-i, ass-a tewweḍ d aseklu meqqren, iẓuran-is wwten deg-i.

Tutlayt-inu: Tineggura-a, aṭas yilmeẓyen i yettarun s tutlayt-nneɣ tamaziɣt taqbaylit, kečč d yiwen seg-sen. Annect-a d afran neɣ d tamara?

Fahim Mesεuden: Yelha imi neqwa yid-neɣ, tuḥwaǧ-aɣ akk teqbaylit. Nekk, ma yehwa-ak d tamara kan i yi-ideggren akken ad aruɣ. Ur frineɣ ara ad iliɣ d amaru neɣ d amedyaz, acku si zik ttaruɣ i yiman-iw kan, ḥemmleɣ tira, ayen uriɣ qqareɣ-t-id i yimdukkal-iw kan akken ad as-slen. Uɣalen deggren-iyi akken ad d-siẓergeɣ idlisen. Seg yimiren i yebda umecwar-iw.

Tutlayt-inu: Neẓra dakken turiḍ aṭas yidlisen i deg tnuleḍ ddeqs tewsatin d wanawen. Acḥal n yidlisen i turiḍ ar ass-a? Ttxil-k, bder-aɣ-ten-id yiwen yiwen. 

Fahim Mesεuden: Uriɣ 6 yidlisen : 

1-Tiyersi d ammud n yisefra, 2013.

2-Timsirin n ddunit, d tullisin akked tneqqisin, 2014.

3-Anza d ungal, 2016.

4-Izlan n tlawin, d anadi (tamedyezt n temɣarin akked wansayen), 2017.

5-Iziran n temẓi, d ammud n tullisin d yeḍrisen i yigerdan, 2019.

6-Izir deg irebbi n teẓgi, d tanfust i yigerdan, 2020.

Tutlayt-inu: Anida ttnuzun?

Fahim Mesεuden: Ttnuzun akk di tnedlisin n tmurt n Leqbayel. Timsirin n ddunit zemren ad t-afen medden di internet.

Tutlayt-inu: Ayen nettwali igerrez di tsekla-k, d tikci n wazal ladɣa, i tgemmi d yigerdan. Acu d tamentilt n way-a?

Fahim Mesεuden: D ilem i yellan deg wannar i yi-ideggren. Igerdan ur ufin ara tasekla yeddan d uswir-nsen. Asmi lliɣ yakan d aselmad, ttxemmimeɣ ad aruɣ idlisen i yigerdan. Ass-a, aql-i deg-s.

Tutlayt-inu: Si tmucuha d yiḍrisen i turiḍ i yimeẓyanen, tezriḍ ɣer tezlatin i asen-tbuddeḍ. Taneggarut i d-tessuffɣeḍ d "iziran". Ta d yiwet tezlit igerrzen aṭas. Amek i tt-mugren yimdanen? 

Fahim Mesεuden: Ihi, ur bniɣ ara yiwwas ad aruɣ tizlatin i yigerdan. Ulamma cennuɣ kan i yiman-iw ger yimdukkal d twacult-iw. Maca asmi d-sɛiɣ mmi, cennuɣ-as s teqbaylit, dɣa usant-d tezlatin-agi deg wallaɣ-iw… Xemmeɣ ad tent-skelseɣ akken ad awḍent akk tameẓẓuɣt n yal agrud aqbayli anda ma yella di ddunit. Tura akka, teffeɣ-d yiwet n tezlit, meɛna mazal 6 nniḍen ad d-ffɣent deg wussan i d-iteddun, sya ar taggara n useggas ad d-ffɣent akk di Youtube. Wid-n yettnadin ad asent-slen, ad nadin kan ɣef yisem « IZIRAN »

Tutlayt-inu: Llan yisenfaren nniḍen?

Fahim Mesεuden: Llan sin yidlisen wejden, yella wungal, yella udlis n wuraren i yigerdan. Niqal llan ad d-ffɣen acḥal aya meɛna taswiɛt ur terkid ara, dɣa weǧleɣ-t. Tura akka ur tt-ɛeṭṭilen ara ad d-ffɣen, ahat sya ar taggara n useggas?
Tutlayt-inu: Amek i tessawaḍeḍ ad tezdiḍ ger umahil-ik d twuri-k n umeskar?

Fahim Mesεuden: Yal tawuri s wakud-is. Mi ara tḥemmleḍ ayen txeddmeḍ ad as-d-tafed tallit-is, ad as-tefkeḍ akud i as-ilaqen. Ilaq kan amdan ad yili yesɛa tuddsa deg wallaɣ-is, akked lecɣal-is. 

Tutlayt-inu: Aṭas yimdanen i yettzuxxun s laṣel, nsell-asen qqaren: nekk d aqbayli, d amaziɣ! D acu i izemren ad imel amaziɣ neɣ aqbayli n tidet di tallit-a?

Fahim Mesεuden: Ma yella yiwen yeṭṭef di tmeslayt-is, yettmeslay-itt anda ma yedda igerrez, a-t-an yessidir taqbaylit.

Tutlayt-inu: Ilmeẓyen-nneɣ ass-a, am wid n umaḍal, ttidiren ger waṭas yisemlan, tiɣerɣar n internet yecban youtube, instagram, tiktok, twitter… D acu i ilaqen akken ad sfaydin seg-sen war ma tefsi tutlayt-nneɣ d yidles-nneɣ deg ugaraw-a ur nesεi ixef neɣ ider?

Fahim Mesεuden: Aṭas n lecɣal i yellan lhan deg yiẓeḍwan inmettiyen-agi i d-tbedreḍ. Amedya,  nettwali tulawin sewwayent, ttxiḍint, ilmeẓyen d telmeẓyin ttarun taqbaylit, beṭṭun-d isefra, tizlatin, timsirin n teqbaylit… Sumata yella wayen yesɛan lfayda, yella wayen ur nesɛi lmeɛna. Yewwi-d kan ɣef lɣaci ad fernen lḥebb d ukerfa.
Tutlayt-inu: Swayes i tezmer ad tesεu tmagit-nneɣ amur ger yiɣerfan nniḍen deg usemres n wallalen-a itraren?

Fahim Mesεuden: Ilaq akk Leqbayel ad ḥemmlen taqbaylit, ad tt-ttmeslayen, ad tt-ttarun, ad tt-seqdacen di tudert-nsen n yal ass… Aṭas n leqdic i ilaqen. Ilaq usnulfu ara d-ijebden lɣaci n umaḍal. Meɛna aya yuḥwaǧ tadrimt aṭas. Acku amur ameqqran n wid iqeddcen ɣef teqbaylit d imeɣnasen kan, rennun-ten si leǧyub-nsen acku bɣan ad tidir teqbaylit.
Tutlayt-inu: D acu i d asirem-ik ameqqran?

Fahim Mesεuden: Asirem-iw, leqbayel akk ad issinen tira, ad qqaren idlisen yuran s teqbaylit.
Tutlayt-inu: Awal a-t-an ɣur-k akken ad tefkeḍ izen i wid iwumi tebɣiḍ: tawacult, imeɣriyen d wid akk εzizen fell-ak.

Fahim Mesεuden: Tanemmirt i kečč d-yerran tamawt ɣer wayen ttaruɣ.

Tadiwennit, yexdem-itt Sadaq Bendali

https://sadbendali.blogspot.com/2022/06/tadiwennit-akked-umaru-fahim-mesuden.html