Aserwet d armud n tfellaḥt yellan akk deg tumura n ddunit, yettili-d deg unebdu mi ara d-megren nneɛma iḥedmen, s unamek nniḍen d ferru n lḥebb ɣef walim. Di tmurt n Marikan, Asya d lber n Luṛuba deg tallit n zik yettili-d s uɛekkaz neǧren i wannect-a s kra n yisefraren ittunefken akken ur ttfeddixen ara lḥebb-nni. Ma nezzi-d ɣer Tefriqt n ugafa, di tmurt n Leqbayel ad d-naf serwaten s tyuga.
Deg tazwara uqbel ad bdun aserwet , ad ḍeṛṛin annar anda ara srewten. Uqbel akk, ad awin leɣbar n yizgaren d waman, s yen ad selɣen tiɣerɣert-nni n urwet, aya-gi ur d-yelli ara kan akka dimi k-qqaren a bab n wawal yezwar-ik bab n wakal, iswi-nsen, mi ara d-yefrari lḥebb-nni ur t-itett ara wakal. Mi ara yenǧer dayen iɣerra, afellaḥ ad iheggi akk allalen s wacu ara yexdem ama (tazzert, timedwasin, tikmamin, tazaglut…).
S yen ɣer-s, ad qqnen tayuga n yizgaren, iɛudiwen… Ad bdun aserwet s ddersa gren daxel n wannar (irden, timẓin…), kra ara yekk wass, afellaḥ ad itezzi deg unnar s tyuga-s, ad yesserwat ddersa, ad itetti, ad iteddu yeqqar: a weɛli nnac nnac, lḥebb-ik iga tirac". Ma llan yid-s wiyaḍ, ad as-d-ṭeggiren nneɛma ɣer tagnit , wiyaḍ ad as-d-ṭṭummun s tmedwasin, akken akken arma sneɣden kra yellan.
Ticki yenɣed mliḥ, ad bdun azuzer neɣ asizdeg, d-yettilin swaswa deg tremt n unezwu, mi ara d-iserreḥ ubeḥri dɣa yettawes-iten deg-s, mi ṭṭfen tazzert ad ttekksen alim ɣer tama, lḥebb-nni izedder. Mi d-yeḥder kfan, llan wid itterran tayuga tayeḍ n tikkelt i wakken ad rnunt cituh, ad alsen azuzer, llan wid ittṣeffin srid tirect, akerfa weḥḥed-s, lḥebb weḥḥed-s. Mi sulin armud-agi, ad ktilen s lgelba s yen ad bḍun nneɛma.
Deg tallit n zik afellaḥ yettawi amur wis semmus, bab n wayla yettawi ukkuẓ n yimuren ma d akerfa beṭṭun d izegnan. Deg taggara n userwet, yella uniwel d ansay i wakken aburket n nneɛma ad yili di yal aseggas i deg t-zerrɛen. Aniwel-agi, yella umgarad si tama ɣer tayeḍ deg tgelwin, wa d seksu n tasilt, wa d ameqful s tmellalin yeslin…
----Deg tallit n tura, aserwet yettili-d s wallalen itraren d tmacinin timikanikin; d tigetwuranin, din tamegra, din aserwet, din asizdeg d ujmeɛ n lɣella. D tin yennerna aṭas deg lqern wis 19. D tidet sifessen taɛkemt ɣef umdan yerna afellaḥ yuɣal yettawi azgen n umur neɣ d adrim, d abaɣur meqqren imi aṭas n ufares id-jamaɛen i wass, tadamsa d tin d-yessekcamen aṭas n tedrimt seg-s. D acu kan seg tama tayeḍ, yessenɣes afus ixeddmen, imi allal atrar ur ixes ara aṭas n yixeddamen akken ad t-selḥun, ayen yeǧǧan trebbawt tegget ladɣa deg yiseggasen-as-agi ineggura. Ansay n uniwel yettwakkes maḍi, d imexḍa kan uɣur d-yeqqim.
Racidda ƐEMMAR
tutlayt-inu
Commentaires
Enregistrer un commentaire