Tasensegmit: assaɣen ger uselmad d yinelmaden-is

Assaɣen ger uselmad yinelmaden-is

Aselmad d yinelmaden-is, d sin yiferdisen igejdanen deg uɣerbaz neɣ di yal aɣsur n uselmed. Ur yelli uɣerbaz ideg ulac-iten. Akk ayen ara yexdem yiwen seg-sen, yettḥaz tiddin n temsirin d yirmad iɣurbizen. Assaɣen-a iɣef i d-newwi awal, yessefk ad ilin gerrzen. Amqadar d umbeddal n tektiwin ger sin yidisan, yessefk ad yettwaḥrez. Aya, yettall aṭas mačči drus deg usiweḍ ɣer yiswan yettujerrden. Mi ara yili kra n wugur neɣ n yir assaɣ ger "umesɣar" d yigerdan-is, yettḍurru ama tigawt n uselmed (ɣer uselmad) ama tin n ulmud (ɣer yinelmaden).

Aselmad, yelha-as uqerreb ɣer yinelmaden i wakken ad yissin aḥric n tudert-nsen i yuklalen ad t-yessemres i tifrat n yiɣeblan. Deg waṭas tegnatin, iɣeylufen n unelmad neɣ n tnelmadt, ttilin d tiseɣlit zdat-s i usfari deg ulmud-is. Aselmad, ma "yejbed-d" anelmad ɣur-s, d ayen i t-yettallen deg useddu n temsirin-is, aḍfar-nsent d tegzi n yigburen n wahilen n uselmed. Asebɣes n uselmad, yettarra-t irennu deg wussisen d usuffeɣ n tzemmar-is. D yiwen wallal n uḥelli n yiswan n uselmed d ulmud. 

Aselmad daɣen, d amdan ay yella, yettḥulfu i yal taɣawsa, yuklal ad yettwagzu ula d netta. Nezmer ad t-nesserwes ɣer tala ansi d-ttagmen yimdanen. Ilaq-asen ad ttagmen seg-s war ma sluɣen-tt. Ma tluɣ tala, tettruḥu tezdeg n waman-is iwumi sran medden di tudert-nsen. Inelmaden, ilaq ad myallen d uselmad-nsen akken ad yessawaḍ ad asen-"yettmuddu" timussniwin i ḥwaǧen ɣur-s. S wakka, ad aẓen yilmuden-nsen akken iwata ɣer zdat d usnefli-nsen. 

Tikwal, ttilin kra n yinelmaden ḥemmlen ad d-gen iεekkiren i uselmad-nsen deg urmud n uselmed. Am wid i as-iteggen adɣaɣ deg usebbaḍ. Aya, d ayen i yettuɣalen mgal-nsen acku uguren ttḥazen tilḥin yelhan n temsirin, iswan-nsent d yigmaḍ yetturaǧun. Assaɣen ger uselmad d yinelmaden-is, ilaq ad yili useḥbiber fell-asen akken ad qqimen kan lhan, gerrzen. Ta, d YIWET TSARUT ILEDDIN TIWWURA N TUSSNA D TMUSSNI. Tasarut-a, yessefk-as ad tenneḥraz akken iḥerrez umdan tasarut n uxxam-is.

S.Bendali

Commentaires