Ass-a ad d-nawi awal ɣef Buεfif. Dacu-t? Anwa i t-ixeddmen? Melmi i d-yettili? Anida? Amek? Iwacu-t?
Ansay-a ttgent Leqbayel, yettili-d deg taggara n tegrest d tazwara n tefsut (furar). Di tazwara, aheyyi-ines, yettili-d mi ara mlilien kra n yilemziyen, ad msefhamen ɣef uzemz ideg ara d-yili, wa yekkat tajewwaqt (zemren ad ilin ugar), wa d abendayer, wayeḍ d ajemmaε, wa d aceṭṭaḥ (wa, ad yettucebbeḥ am tmeṭṭut, udem-is yeffer, yiwen ur iẓerr d anwa-t). Wayeḍ d amɣar, d netta i ideεεun.
Beddun nnig taddart, yal axxam iɣer ara awḍen, ad ḥebsen ɣer-s, ad as-dεun s lfal n lxir d wawal aẓiḍan :
- Kker ad iskker Rebbi sseεd-ik.
- Ad yessefti Rebbi tarwa-k.
- Awer texsi tafat deg uxxam-ik.
- Ad yeg Rebbi ussan-ik d imellalen.
- Ad d-yefk Rebbi aseggas n ṣṣaba...
Wid-nni yal tikkelt ad d-qqaren: amin.
Akka alamma yeffeɣ-d bab n uxxam-nni, ad asen-d-yefk kra (zzit, timellalin, idrimen, ...).
Tikwal, baba n uxxam-nni yessutur deg-sen taɣect i as-yehwan, yella wanda daɣen i iceṭṭeḥ d uceṭṭah-nni. Akka alamma fukken akk taddart-nni. Syin, ad d-qellben annar anda ara kemmlen alamma yedda yiḍ. Da, taqaεet tḥemmu, da, d idrimen i iteddun, win iran ad yecḍeḥ d uceṭṭaḥ-nni, ad yewwet ɣer lǧib. Mi fukken, ad ṭṭfen abrid-nsen, timlilit d taddart nniḍen. Ayen i d-jemεen ad t-bḍun gar-asen.
Ansay-a, yenger deg yiseggasen iberkanen yezrin ɣef tmurt-nneɣ, d acu kan, llan wid i t-id-yerran tineggurz-ayi (xas drus), rnan-as-d kra n wallalen n uẓawan am lɣiḍa.3
Ḥamdad Zah
Tutlayt-inu
Commentaires
Enregistrer un commentaire