Tamda n teslit

 Rebbi, yella, iɣzer, yella.

Yella   deg   Ḥlawa,   yiwen   urgaz   yezweǧ.   Yuγ   tameṭṭut,   nettat   d   tamrabeḍt,   isem-is   Lalla Meryam. Yeqqim acu yeqqim netta d tmeṭṭut-is, yuγal yedden-d deg uqerruy-is ad iεiwed zzwaǧ. Yettqellib anda ara yezweǧ. 

Yiwwas, yufa anda: deg Mγira. Γran lfatiḥa. Xemseṭṭac n wussan d tiddin. Yekcem-d s axxam-is, yewwi-d aksum. Iluεa tameṭṭut-is, yenna-as:“Sεiγ inebgawen , ad tessewweḍ imensi yelhan: azal n εecra n medden.”Tenna-as: “yerbeḥ”. Nettat, d nneyya.yeffeγ, iruḥ ad d-ilaεi medden ara d-yawin tameṭṭut d tislit. 

Tesla-as-d yiwet n temγart mi yessawel i lγaci: “Ad tedduḍ d aqeffaf.” Tamγart-nni, twala aṭas n medden i wumi yessawel, tcukket acu ara yexdem. Tluεa yiwen, tenna-as:“-Anda ara truḥem?” Yenna-as : “A yexti, ad d-nawi tislit i leflani.”Tenna-as: “Σni yezweǧ?” Yerra-as-d:  “Ass-a, ara d-teddu.” 

Truḥ-d temγart-nni γer tmeṭṭut-is tamezwarut, tufa-tt ara tessewway seksu. Tenna-as: “Acu i txeddmeḍ akka?” Tenna-as: “Sewwayeγ imensi i yinebgawen.” Terra-as:  «Σni ur teẓriḍ ara, acu i kem-yuγen? Argaz-im, iεawed zzwaǧ, yerna-d tameṭṭut fell-am. Ur ssewway ara, anef-as ad ikemmel lecγal i yiman-is.” Terra-as : “Ala, ad kemmleγ lecγal-iw: Rebbi yella, iγzer yella!” 

Almi d lawan n tmeddit, terkeb-d teslit γef userdun, teddun deg ubrid. Yefk-d Rebbi lehwa, ṛṛεud, lebraq; iγzer yeḥmel. Akken i d-wwḍen γer yiγzer n Buḥlu, kecmen γer daxel (imir-n ulac tiqenṭert): lḥemla truḥ-d, ur zmiren ad rewlen γer sdat, ur zmiren ad uγalen γer deffir. 

Tewwi-ten lḥemla am teslit-nni, am userdun-nni am lγaci-nni. Γef wayen akka i yeḍran i as-qqaren medden “Tamda n teslit”.

Genevois, H. Monographies villageoises, Collecon « Bilingues », EDISUD, 1996, p16, pp34-36.w

Tesseqεed-it ɣer tira tamirant Karima Cebbaḥ

tutlayt-inu