Taqendurt n Leqbayel

Taqendurt n Leqbayel. ur telli ara kan d timelsiwt tettlusu tmeṭṭut akken ad tesser iman-is, neɣ akken ad terr asemmiḍ ɣef tfekka-s. Maca taqendurt, d azamul n nnif, lḥerma d tirrugza., d azamul n yedles d tgemmi, yewwi-d fell-aɣ ad nesseḥbiber fell-as.

Taqendurt n Leqbayel, ad yuɣal umezruy-ines ɣer twinas n yiseggasen, yal tasuta tettaǧǧa-tt-id i tayeḍ. D lwert neɣ d agerruj n yimarawen -nneɣ. Ilaq ad tt-nessider, ad neddu yis-s ɣer sdat. Ulac Taqbaylit ur nesεi neɣ ur nelsi taqendurt, mezẓiyet neɣ meqqret di leεmer,   d nettat i as-irennun ccbaḥa d sser.

Amek tga tqendurt n zik? 

Taqendurt, zik, d tahrawant, d taɣezzfant, tettɣummu akk tafekka n tmeṭṭut. Tettcabi ɣer tin n Yicawiyen d tin n Yimaziɣen n Merruk. Ifassen-is, ɣezzifit, ttaṭṭafent-tt s uxellal ɣer tuyat, deg yedmaren ttlusunt abruc. Ttgent-as lfuḍa, ttenḍent-as asaru deg wammas. Γef uqerru ttarrant amendil azewwaɣ neɣ tafunart, rennunt axelxal deg uḍar. Ssenf-agi n tqendurt ssawalen-as * timleḥḥeft *. Lkettan-is, yal ta, s wacu i tt-tettxiḍi, ta d leḥrir, tayeḍ d lxid. S umata, taqendurt, zik, tettwaxaḍ s kra n yeḥwicen d tleflufin d yizagzagen. Leqḍent-tt s tfednin. Yal tasgift neɣ azagzag yeqqen ɣer wayeḍ, ttgent adur neɣ sin akken tezmer lal-is.

Taqendurt n telmeẓyin:

Tilmeẓyin d tullas, sεant ssenf n tqendurt i wumi qqaren takessiwt. D taqendurt yettemcabin ɣer rruba (la robe), ttebḍina-s, tejbed ɣer deffir, teqlec aţas deg wammas, ttgent-as taɣeggadt s tesfifin sufella azal n krad neɣ ukkuz n yiḍuḍan, ttcuddunt-tt ɣer sdat.

Zik di tmeɣriwin tilawin ttlusunt yiwen n ssenf n tqendurt i  ccḍeḥ. Yuɣal seg wammas d akessar, yeqlec mliḥ mliḥ, yeččur d iḥwicen d yizagzagen. Qqaren-as Rruba.

Taqendurt taglantit:

Taglantit d taqendurt i ttxiḍint s yiwen n lkettan yemgaraden ɣef wiyaḍ ; ccac mager iṭij, ccac frank, ccac lḥafer n yizem, ccac ddu s talwit, ccac ajiju... Taqendurt-a d tin ur nesεi ifassen, ttxiḍint-tt s tḥucay, izagzagen d tleflufin. Taglantit rennunt-tt ɣef tqendurt-nniḍen.

Kra n lemtul ɣef tqendurt:

Tilawin zik-nni. ttawint-d kra n lemtul ɣef lesnaf  n lkettan i ttlusunt, qqarent-as :

  1- Ccac ddu s talwit

     Car ay ara k-d-tefk trumit

     Ma izeddeg yiwen n wass

     Tameddit ad tt-id-tawḍit.

2- Ccac ajiju

    Mi t-telsa teslit

    Tamɣart ad tt-id-yettεujju

Azalen n yiniten d yinumak-nsen:

Initen i smenyafent tlawin,  ama i lkettan neɣ i tesfifin d tleflufin, sεan azal d unamek di tmuɣli-nsent. Xas akken nettaf aṭas tlawin i yesmenyafen initen n tefsut, ttxiḍint am uzegzaw, awraɣ....ula d amellal, yeṭṭef azal meqqren, imi d  ini n tqendurt n lḥenni i tettlusu teslit . Lkettan-is d leḥrir neɣ d ccac ḥayat.  Tuget-nsent, ttxiḍint-tt s txeggadt n Yiwaḍiyen, ad tili txad mliḥ almi ur d-yettban lkettan n ttebḍina. Ula d lfuḍa ttaččarent-tt, almi qrib d ammas. Tennḍent-as asaru ɣezzifen, neɣ ttgent-as lmencef.

Ayen i d-yennulfan daɣen di tqendurt n yimira, d lkettan  aberkan i ssexdament di txeggadt tatrart. ama d win n leḥrir neɣ n ccac hayat. Ger wayen mmalen yiniten, ad naf:

 Awraɣ: d ini n yiṭij, yettmuddu-d tazmert.

 Azegzaw (aḥcayci): d azamul n tudert d usirem d ubeddel ɣer wayen yelhan.

 Amidadi: d asfillet i tlelli.

 Ačini/ačinawi: yessenfalay-d iseɣ, nnif d tirrugza.

 Amellal: yettusexdam i tqendurt n teslit.

Taqendurt, assa:

Ayɣer i d-yella ubeddel n tqendurt ɣef wakken yella zik?  Acu-ten lesnaf i d-yennulfan? .

Ambeddal n umaḍal, d umbeddal n tsutwin, yerra taqendurt ad tbeddel ula d nettat ɣef wakken tella zik, ama di txeggadt neɣ di ssenf n lkettan . Taqendurt, zik d timelsiwt n yal ass, xas akken εezlent tid n leqdic ɣef tid n ccbuḥ. Ass n wassa, tuɣal tettmelsa kan di tmeɣriwin d tegnatin n tumert am wakken tettwaεzal, tuɣal di ṭṭerf.  Tasebba d aselsu agraɣlan i d-yettnulfun, simmal. 

Aţas n lesnaf n txeggadt i d-ibanen s yeḥwicen d yizagzagen imaynuten d wid yettmucεalen. Afessel-ines yemgarad ɣef win n zik s waṭas. Ad naf taqendurt d tuḍyiqt, teḥkem mliḥ, d tin i d-yesbanayen tafekka n tmeṭṭut. Ma d ifassen-is wezzilit, tikwal ur ten-tesεi ara maḍi. Llant teqnedyar ɣezzifen, llant daɣen tid wezzilen'. Llant tid ttlusunt s lfuḍa, tiyad mebla lfuḍa.

Yal tamnaḍt n Leqbayel s tqendurt-is:

Yal tamnadt si tmurt n Leqbayel, tesεa ssenf n tqendurt s wacu tettwassen, temgarad ɣef temnadt-nniḍen. S ssenf n tqendurt ara tεeqleḍ lal-is ansi-tt. Gar lesnaf-a ad naf : 

Gergari, caryata, ameddah, taxeggadt m-tebzimin, taxeggaḍt m-tedliwin, abrudi s ufus d win n tmacint, taxeggadt n Tiɣilt...

Taqendurt n Yiwaḍiyen:

Ma nebder-d taqendurt n Yiwaḍiyen, d tin ttxiḍin s lkettan n leḥrir, ttaččaren-tt s yeḥwicen n leḥrir. Tuddar akk i as-d-yezzin d taqendurt n Yiwaḍiyen i tettrusu teslit ass n lḥenni.

Taqendurt n temnaḍt n Meqleε:

Di temnadt n Meqleε ; yal tama si tudrin-is tesεa ssenf n tqendurt-is. S tuget, ttxiḍint s yeḥwicen yettmucεalen . Ma d iḥwicen iquranen εezlen-ten i tqendurt n yal ass. Zik. taqendurt-nsen wezzilet, tuɣal ddaw tgecrar, tesεa ijifar iqelcen, tettmelsa mebla lfuḍa. Akka imira, ssiɣzifent taxeggadt n tqendurt, ttcuddunt-tt s usaru neɣ taɣeggadt i xeddment s yifasden-nsent...Lfuḍa ɣur-sen ala tin meqqren di leεmer i tt-yettlusun.

Taqendurt n jida:

Ssenf-nniḍen i d-ibanen taggara-a, ttlusunt-tt akk tilawin abeεda tilmezyin, d "taqendurt n jida". *. Lkettan-is, d lxiḍ, ttxiḍint-tt s tesfifin tihurawanin, d taɣezzfant, ifassen-is ar texlifin, tettmelsa mebla lfuḍa, ttenḍent-tt s usaru ɣezzifen. Taqendurt n jida, tuɣal d taqendurt n yal ass, teddunt yis-s ɣer umahil d uɣerbaz...

Taqendurt taqbaylit, d aɣbalu n tudert:

Si zik tamettut taqbaylit tezga ɣer tama n urgaz-is, deg usbeddi n uxxam d ttrebga n tarwa-nsen.  Aṭas n tlawin i yettxiḍin neɣ i yeznuzun i tlawin  tent-yecban, akken ad d-ḥellint tadrimt s wacu ara refden tiwaculin-nsent d dderya-nsent. Ssuma n tqendurt temgarad si ssenf ɣer wayeḍ,  Daɣen temgarad ma teččur txeggadt-is neɣ d talemmast. Ula d ssenf n lkettan yezmer ad izeyyed neɣ ad yessenqes di ssuma-s.

Tekka-d timura, tezger ilel:

Taqendurt n Leqbayel, ur teqqim ara kan di tmurt n Leqbayel, tekka-d akk tamurt-nneɣ, tezger akkin i yilel, ttlusunt-tt ula d tiberraniyin.

Ihi, xas akka aṭas n umaynut d umbaddal i d-yellan ɣef tqendurt n Leqbayel, ad teqqim d talaba n sser d nnif. Lεezza-ines weḥd-s, ur tt-yettawi yiwen. D nettat i irennun ccbaḥa d lhiba i tmettut taqbaylit. Γef waya yewwi-d ad temmels s zzux d unerfud n uqerru.

Cebbiri Farida

tutlayt-inu

Awal n tutlayt-inu:

Di tazwara, ad nesnemmer aṭas tameskart n umahil-a  unadi. massa Cebbiri. Tajmilt-is, meqqret ɣef wussisen-is ur neḥbis armi d-yers umahil-is zdat wallen-nneɣ ad t-t-nɣer  Tayri-s i Teqbaylit d yedles-is, mačči d awal kan. Ha-tt-a zdat-wen, temla-tt-id deg umagrad-is.

Syin akkin, ma nmuqel ɣer usentel s telqey, ad naf mačči d ayen isehlen akken ad d-yettwagem akk wayen yegber. Ama deg wayen yerzan, timnaḍin, tiɣawsiwin, adeg, akud.... i icudden ɣur-s; neɣ d allalen akk i yezmer ad yeḥwaǧ.

Seg wakken, taqendurt taqbaylit (n Leqbayel), d yiwen uzamul axatar n tmagit n tmetti-nneɣ, ad ken-nenced ad d-ternum ayen tesεam d timussniwin d yisallen, i yellan ahat di tudrin-nwen. Tiɣri, ad n-truḥ ladɣa ɣur-went, kunnemti a tilawin. Arut-d iwenniten-nwen ddaw umagrad. Tanemmirt.