Isestanen/imattaren

Deg usesten/tuttra, nessemras awalen iwakken ad nesteqsi ɣef kra. Neqqar-asen awalen isestanen neɣ imattaren, ttilin di tazwara n tefyar tisestanin/timattarin. Isestanen, bḍan ɣef snat taggayin: imqimen isestanen d yimerna isestanen.

1. Imqimen isestanen/imattaren:

Amqim asestan, nessemras-it deg usteqsi ɣef umdan, aɣersiw, taɣawsa neɣ kra n wayen iḍerrun. Imqimen isestanen, d wi:

Anwa? nessemras-is deg usteqsi, ma nerǧa tiririt s yisem asuf amalay.

 Anwa i yuran ungal amezwaru di talsa? D Afulay.

Anta? nessemras-it deg usteqsi, ma nerǧa tiririt s yisem asuf unti.

 Anta i d tagellidt n Yimuhaɣ? D Tinhinan.

Anwi? nessemras-it deg usteqsi, ma nerǧa tiririt s yisem asget amalay.

 Anwi i d imawlan n tmurt-a? D Imaziɣen.

 Anti? nessemras-is deg usteqsi, ma nerǧa tiririt s yisem asget unti.

Anti i idles d wansayen-nneɣ? D tilawin.

Wi? nessemras-is deg usteqsi, ma nerǧa tiririt ideg ur nesεi ara tikti ɣef win (wid, tin, tid) ara d-yettwabedren deg-s.

 Wi  tufam di tejmaεt? Nufa imɣaren d yilmeẓyen.

 Acu? nessemras-is deg usteqsi, ma ur nesεi ara tikti ɣef wayen ara yilin neɣ ara d-yettwabedren di tririt i nerǧa. Imqimen isestanen, d wi:

Acu teččam di tmeɣra? Nečča seksu s uksum n uεejmi.

Tamawt 1:

Imqimen isestanen "anwa, anta, anwi, anti, wi, acu" zemren ad ttusmersen d imassaɣen di tefyar tuddisin, md:

• La yettnadi anwa ara yawi yid-s.
• La yettnadi anwi ara yawi yid-s.
• Tenna-as anta tḥemmel.
• Ini-as anti teǧǧiḍ deg uɣerbaz.
• Ur ẓriɣ ara wi yeqqimen di tmurt.
• Ssuter-d acu tebɣiḍ.

Tamawt 2:

Kra n yimqimen imassaɣen, nessemras-iten d imqimen imattaren/usestanen, am: iwumi, imumi, wiɣer, uɣur, s wayes, s wiyes, s wacu, ukkud, wikked.

• Iwumi/imumi tefkiḍ adlis-nni?
• Wiɣer/uɣur teǧǧiḍ memmi-m?
• S wayes/s wiyes/s wacu ẓeḍḍen tiqecwalin?
• Ukkud,/wikked yettruḥu dadda-k ɣer yiger?

2. Imerna isestanen/imattaren:

Amernu asestan, nessemras-it deg usteqsi ideg nebɣa ad nẓer tagnit ideg tḍerru tigawt: adeg, akud, taɣara tasmekta neɣ tamentilt. Imerna isestanen igejdanen, d wi:

Anida, ansi, anisi, aniɣer, aniwer, sani? - i wadeg.

• Anida teqqareḍ? 
• Ansi yella ubrid ɣer Tala n Yilef?
• Anisi yella ubrid ɣer Tala n Yilef
• Aniɣer yerra umcic-ik?
• Aniwer yerra umcic-ik?
• Sani yerra umcic-ik?

Melmi, si melmi, ar melmi? i wakud.

• Melmi temmut Faḍma n Sumer?
• Si melmi d-tegguǧǧem ɣer da?
• Ar melmi ad ken-nerǧu?

Amek? i tɣara.

• Amek tessewwayeḍ tiɣrifin?
• Amek bennun tizamugin?

Acḥal, annect? i tesmekta.

• Acḥal teɣriḍ di tesdawit?
• Annect n wurkilen i teẓẓam?

Ayɣer, acuɣer, acimi, iwacu? i tmentilt.

• Ayɣer ur tettawiḍ ara yid-m tasiwant?
• Acuɣer ur tettawiḍ ara yid-m tasiwant?
• Acimi ur tettawiḍ ara yid-m tasiwant?
• I wacu ur tettawiḍ ara yid-m tasiwant?

Tamawt 3:

Imerna isestanen, zemren ad ttusmersen d imassaɣen di tefyar tuddisin, md:

• Yessen Yuba ansi ara iεeddi ɣer Tala n Yilef.
• Ini-iyi-d aniɣer truḥem iḍelli.
• Mmekti-d melmi tkecmeḍ ɣer uɣerbaz.
• Ur cfiɣ ara si melmi d-negguǧǧ ɣer da?
• Bɣiɣ ad as-d-tiniḍ ar melmi ad yezdeɣ yid-neɣ.
• Tesselmed i yelli-s amek ara tesseww tiɣrifin.
• Yettu umuḍin acḥal yekmen deg uxxam.
• Behten yicenga deg-neɣ ayɣer ur telli tdukli gar-aneɣ.

Acu n tririt i yal asestan?

A. Imerna isestanen/imattaren:

Anwa? anta? anwi? anti? tettili tririt fell-asen s usumer igebren tazelɣa n tilawt "d" d yisem neɣ asenfal-is. Amgired, nettaf-it kan deg umḍan d tewsit. Imedyaten:

- Anwa i yuran tullist? D anelmad D netta. D anelmad in tesdawit. D win yuran tamezgunt...

- Anta i yuran tullist? D tanelmadt. D nettat. D tanelmadt n tesdawit. D tin yuran tamezgunt...

- Anwi i yuran tullist? D inelmaden. D nitni. D inelmaden n tesdawit. D wid yuran tamezgunt...

- Anti i yuran tullist? D tinelmadin. D nitenti. D tinelmadin n tesdawit. D tid yuran tamezgunt...

Wi? tettili tririt fell-as s usumer igebren tazelɣa n tilawt "d" d yisem neɣ asenfal-is. Da, ur nezmir ara ad nessugen amḍan d tewsit si tazwara. Imedyaten:

Wi yuran tullist? 

• D anelmad D netta. D anelmad in tesdawit. D win yuran tamezgunt...
• D tanelmadt. D nettat. D tanelmadt n tesdawit. D tin yuran tamezgunt...
• D inelmaden. D nitni. D inelmaden n tesdawit. D wid yuran tamezgunt...
• D tinelmadin. D nitenti. D tinelmadin n tesdawit. D tid yuran tamezgunt...

Acu? s umata, tettili tririt fell-as s usumer igebren:

a. amyag d usemmad usrid neɣ asegzay n umigaw:

• Acu turiḍ? Uriɣ asefru.
• Acu yeḍran? Yergel ubrid.
• Acu tt-yuɣen? Tuḍen.

b. tazelɣa n tilawt "d" d yisem (neɣ asenfal-is), md:

• Acu tebɣam? D izerfan.
• Acu tebɣam? D izerfan n uɣref-nneɣ.

Iwumi? tettili tririt fell-as s usemmad arusrid:-

- Iwumi tefkiḍ adlis-nni? Fkiɣ-t i Masil.

Wiɣer? s wayes? ukkud? tettili tririt fell-asen s usemmad anezɣan:

- Wiɣer teǧǧiḍ memmi-m? Ǧǧiɣ-t ɣer nanna. (tanila, adeg)

- S wayes ẓeḍḍen tiqecwalin? Ẓeḍḍen-tent s uɣanim. (allal)

- Ukkud yettruḥu dadda-k ɣer yiger? Iteddu akked baba. (tadukli)

B. Imerna isestanen/imattaren:

Anida, ansi, aniɣer, sani? - Tettili tririt fell-asen s umernu n wadeg neɣ usemmad anezɣan n wadeg.

- Anida tzedɣeḍ? Zedɣeɣ di taddart./Zedɣeɣ, da.

- Ansi yella ubrid ɣer Tala n Yilef? Abrid, yella si Buɣni.

-Aniɣer ara truḥem? Ad nruḥ ɣer Tubiret.

Melmi, si melmi, ar melmi? - Tettili tririt fell-asen s umernu n wakud neɣ usemmad anezɣan n wakud.

- Melmi temmut Faḍma n Sumer? Temmut zik. Temmut deg useggas n 1863.

- Si melmi d-tegguǧǧem ɣer da? Negguǧǧ-d deg unebdu-nni.

- Ar melmi ad ken-nerǧu? Rǧut-anen ar tameddit.

Amek? - Tettili tririt fell-as s umernu n tɣara, s usemmad anezɣan n tɣara neɣ s umyag yemmalen aglam.

- Amek tleḥḥu tsekkurt? Tleḥḥu akka. Tasekkurt, tleḥḥu am tjirra.  Tettecrurud.

Acḥal, annect? - Tettili tririt fell-asen s umernu n tesmekta neɣ s tenfalit yemmalen amḍan n : timar, ikilumitren, iseggasen, tiɣawsiwin...

- Acḥal teɣra di tesdawit? Teɣra aṭas. Teɣra smus yiseggasen.

- Annect n wurkilen i teẓẓam? Ẓẓiɣ sḍis wurkilen.

- Acḥal yellan ger Bgayet d Tizi Uzzu? Llan 150 yikilumitren.

- Acḥal n temreqmin i tesεiḍ? Sεiɣ snat.

- Acḥal yeqqim deg yinig? Yeqqim drus. Yeqqim mraw yiseggasen.

Ayɣer, acuɣer, acimi, iwacu? - Tettili tririt fell-asen s tesɣunt n tmentilt "acku", "axaṭer".

- Ayɣer ur tettawiḍ ara yid-m tasiwant? Acku ulac ageffur.

- Acuɣer ur tettawiḍ ara yid-m tasiwant? Axaṭer ulac ageffur.

Tamsirt, sɣur Sadaq Bendali