Nilsun Mandila (Nelson Mandela)

Ababat n Tefriqt n Unẓul

Nilsun (Rolihlahla) Mandila, ilul ass n 18 Yulyu 1918 deg Umtata (Iɣef n Usirem Yelhan, Tafriqt n Unẓul) – Yemmut ass n 5 Dujembeṛ 2013 deg Juhanesburg. D imḍebber ameẓraɣlan (natonaliste) n Tefriqt n Unẓul yernu d argaz n uwanek. Baba-s n Mandila, yella d aɣella (chef) n Yixhusaten. Yezrew Mandila asaḍuf deg Tesdawit n Witwatersrand yernu, deg 1944, yudef ɣer ANC (African National Congress). 

Asmi ay d-tella tdalust (massacre) n Sharpeville deg 1960, Mandila yeǧǧa addud-nnes n umennuɣ war takriḍt (sans violence) i yizerfan n yiberkanen yernu yettekka deg useɣnew n yifer umrig (armé) n ANC umi semman « Ididel n Uɣlan ». Mandila,  yettwabeẓ deg 1962 yernu ssaẓren-t ɣer tkurmut (prison) s teɣzef n tmeddurt. D acu kan, iberkanen n Tefriqt n Unẓul bedden s waṭas ɣer yidis-nnes yernu, ula ma yella deg tkurmut, yeqqel d azamul n umennuɣ n yiberkanen n tmurt-nnes ɣef yizerfan-nsen. 

Deg 1990, yessuffeɣ-it-id uselway F.W. de Klerk seg tkurmut. Deg 1991, d netta ay yeqqlen d aselway n ANC deg wadeg n Oliver Tambo. Deg 1993, Mandela d de Klerk wwin deg sin Arraz n Nubel n Talwit ɣef lǧal n wayen akk ay gan akken ad kksen anagraw (système) n apartheid seg Tefriqt n Unẓul. Deg 1994, yettwafren Mandila d aselway aberkan amezwaru n Tefriqt n Unẓul. 

Deg 1999, yettaxer seg tselwit. Yemmut Mandila deg uxxam-nnes deg Houghton, deg Johannesburg. Mandela yerbeḥ-d leqder d ameqqran aṭas ama deg tmurt-nnes, ama deg umaḍal. Deg Tefriqt n Unẓul, ɣɣaren-as ayyes yettwassen deg udrum-nnes, « Madiba », yernu ɣɣaren-as daɣ « Baba-s n Uɣlan ». 

Ɛumar Mufuq

tutlayt-inu

https://sadbendali.blogspot.com/2020/11/nilsun-mandila-nelson-mandela.html