Awal "zzher", yusa-d seg Taɛṛabt taɣerfant. Din, anamek-nnes "agacur/tawenza (hasard/chance). D acu kan, win s timmad-nnes yusa-d seg Taɛṛabt takelsakt, anda "zahṛa" anamek-nnes "tajeǧǧigt".
Ihi, anamek amezwaru n "zzheṛ" netta d "tajeǧǧigt", sakkin yella-d uneflisem (métonymie) anda awal-nni rran-t d asemɛen ɣef "twenza" (chance). Tintaliwin timaziɣin reḍlent-t-id seg Taɛṛabt taɣerfant n Tefriqt n Ugafa. Tuqqna n tekti n "tjeǧǧigt" ɣer tekti n "twenza" yusa-d seg win ara yesɛun "zzheṛ/tawenza yelhan" - s waya, tella tekti-nni n "uǧuǧǧeg n tmeddurt" - win ay ilan zzheṛ d win umi teǧǧuǧǧeg tmeddurt, ǧǧuǧǧgen-as wussan.
Seg yidis niḍen, yella daɣ ugdawal n "sseɛd" yesɛan daɣ anamek n "zzheṛ/tawenza". Ula d wa yusa-d seg Taɛṛabt. "Sseɛd" anamek-nnes daɣ "tumert/lfeṛḥ". Deg Taɛṛabt taɣerfant, yesɛa daɣ anamek-a. Deg tentala taqbaylit rnan ssuddmen-d seg-s arbib n "aseɛdi" (win yummaren/win yesɛan sseɛd) am wakken daɣ ay yesɛa isem n tmeṭṭut, "Taseɛdit", yettwassnen deg Tmurt n Leqbayel ("Taseεdit" deg waddad aɣarim).
Llan daɣ yismawen niḍen ay d-yettussuddmen seg yisem-a am "Busseɛd" (bu sseɛd - bab n sseɛd - d isem ay d-yettussuddmen s umzenziɣ aɛṛab n "Abu" [baba-s n/bab n] + isem). Awal-nni n Taɛṛabt taɣerfant yekka-d seg uẓar aɛṛab akelsak n SƐD ay d-yefkan "saɛíd" (سعيد) (ummir, win yummaren, win ifeṛḥen) d "saɛáda" (سعادة) (tumert/lfeṛḥ). Ula da, amdan yesɛan "zzheṛ/sseɛd/tawenza" d win ara yummaren/ifeṛḥen".
S waya, yeḍra-d uneflisem deg T taɣerfant, sakkin akken ay t-id-reḍlent tentaliwin timaziɣin.
Sɣur Omar Mouffok
Tutlayt-inu
https://sadbendali.blogspot.com/2021/02/tamull-tussnant-ef-tegmuzart-n-yisem.html
Commentaires
Enregistrer un commentaire