Timlilit d unaẓur Belεid Buεeklin

Ur ilaq ara ad nettu tanekkit-nneɣ d wansi d-nekka. Ssarameɣ tamusni ad tegmu deg wallaɣen.

Belεid Buεeklin d yiwen yilemẓi d-yeflalin si taddart n Tiɣilt Meḥmud, taɣiwant n Ssuq Letniyen, Mεatqa.. Ur d-yekki iɣerbazen n tẓuri, tlul-d deg-s tẓuri i yiman-is segmi meẓẓiy. Yessen ad yurar s uɣanib, yal tafelwit-ines, ɣur-s azal d yizen.

Melmi i tebdiḍ deg ubrid-a n tẓuri? .

Segmi meẓẓiyeɣ ḥemmleɣ taẓuri, sεiɣ lḥir meqqren ɣur-s.

Acu i ak-yewwin ɣur-s? .
Ayen i yi-yewwin ɣur-s d assar (le besoin)  ameqqran akken ad rewleɣ ɣef usedday-iw (univers). Deg-s i ttafeɣ iman-iw, d amḍiq ideg zemreɣ ad aruɣ war imru, ad suɣeɣ war zzhir yerna ad cnuɣ war allalen n uẓawan.

Ayɣer i tessunuɣeḍ aṭas ?

Yal amdan yesεa udem neɣ abrid s wacu i d-yettbeyyin iḥulfan-is, iḥulfan-nni ur yezmir ad d-yini s wawal .Yal amdan yesεa anezgum i iceyyben ul-is d wallaɣ-is ; tayri d wayen i icudden akk ɣer tudert... Yal amdan, yettargu iswi-ines, ad t-yaweḍ-yiwen n wass.

Ayɣer tesmenyafeḍ asuneɣ n wudmawen yettwadnen ɣef wayen-nniḍen? .
Smenyafeɣ asuneɣ acku d itran i ifeǧǧen tamurt-nneɣ . Rnu daɣen d tigejda n tmurt n Leqbayel i iqedcen ɣef yedles, tamagit d tutlayt-nneɣ, uklalen tajmilt.

Amek tettḥulfuḍ i yiman-ik mi ara teṭṭfeḍ aɣnib ?
Mi ara ṭṭfeɣ aɣnib tettas-iyi-d tehregt (inspiration) . Akken i as-yenna Muḥend Isyaxem :  quant je peins , je souffre . Akken ula d nekk mi ara sunɣeɣ.

Anta tafelwit i txedmeḍ?
Di tfelwit tamezwarut, xedmeɣ-d taẓuri tamadwant (art abstrait), asmi tt-kfiɣ ḥulfaɣ i yiwet n tumert d tameqqrant, d ayen i yi-yeǧǧan ad kemmleɣ deg ubrid-a.

Amek tettwaliḍ taẓuri d unaẓur di tmurt-nneɣ? .
D tidet, taẓuri d unaẓur di tmurt-a, aḥlil  ur asen-fkin ara azal. Yerna nesεa aṭas n wid i iẓewren,  mačči yiwen neɣ sin ; imura, imedyazen, imsunɣen....ssaramen dima ad asen-tuɣal tejmilt.

D acu-tt temlilt n unaẓur di tmetti ?
Anaẓur di tmetti d asineg (savoir-faire),  d win Dyettwellihen ɣer uslal n tmusni . Anaẓur d win yettnadin ad ibeddel allaɣen ɣer wayen yelhan.

D timetti i yesεan tazrirt ɣef unaẓur, neɣ d anaẓur i yesεan tazrirt ɣef tmetti ?.
Nekk akken walaɣ, d timetti i yesεan tazrirt ɣef unaẓur. D ayen i yeǧǧan yal anaẓur iqeddec s tmusni-ines, ahat ad yesεu ciṭ n tmuɣli di tmetti.

Acut yizen n tfelwiyin-inek ?.
Tifelwiyin-inu, yal yiwet s yizen-is ; s umata d aseḥbiber ɣef tgemmi d tmagit-nneɣ . D asaki n yemdanen ad rren ddehn-nsen ɣer kra yellan d taẓuri, ad sεun iswan di tudert-nsen.

Ahat yella unaẓur uɣur terriḍ lwelha-k, tettedduḍ deffir-s ?.
Inaẓuren (imsunɣen)  ddeqs i yi-ijebden, gar-asen Lḥusin Ḥeṭṭal (ad as-yeεfu Rebbi), Lḥusin Zeyyani... Bla ma nettu acacfal (le géant) Muḥemmed Isyaxem.

Yella wacu tettheyyin ɣer sdat ?
Akka ɣer zdat ttheyyiɣ kra n tfelwiyin ɣef ddeqs n yisental ; tadukli, imezri n tudert ( passage), rayri, agama Aqbayli d yidurar n Ǧerǧer.

Amek tettwaliḍ wid i iqeddcen ɣef yedles ass-, gar-asen ablug tutlayt-inu?
Wid iqeddcen ass-a ɣef yedles, ablug tutlayt-inu gar-asen, ttwaliɣ-ten am tgejda, sbedden tutlayt tamaziɣt. Ssarameɣ-asen afud igerrzen, d nutni i d amedya ara neḍfer.

Acu tessarameḍ?
Ssarameɣ ahat yiwen wass, ad tfeǧǧeǧ tmurt-nneɣ di yal taɣult . Amennuɣ ad ikemmel abeεda deg usedwel,  ur ilaq ara ad nettu tanekkit-nneɣ, ansi d-nekka . Ssarameɣ tamusni ad tegmu deg wallaɣen.

Awal-ik n taggara i wid yeddan deg ubrid n tẓuri ?.
Awal-iw n taggara, ad asen-iniɣ i kra n wid iqeddcen di tẓuri, ili-ken d iεessasen ɣef wansayen -nneɣ, snefsusit yir leqyud, nnaɣet s tikta-nwen d yimru, s tmusni-nwen ɣef kra yellan d taẓuri. Ladɣa,ur ilaq ara ad nettu ansi d-nekka, akken ad nẓer anida nteddu.

Tadiwennit texdem-as-tt: Farida Cebbiri

tutlayt-inu

https://sadbendali.blogspot.com/2021/02/timlilit-d-unazur-belid-bueklin.html